ಅಡಿಕೆ ತೋಟದಿಂದ ಇಸ್ಪೀಟ್ ಅಡ್ಡೆಯವರೆಗೆ: ಯಾರ ಹಣ, ಯಾರ ಆಟ?

ಶಿರಸಿ: ಶಿರಸಿ ಉಪವಿಭಾಗದ ಡಿವೈಎಸ್ಪಿ ಗೀತಾ ಪಾಟೀಲ್ ನೇತೃತ್ವದಲ್ಲಿ ಸಿದ್ದಾಪುರ ಪೊಲೀಸರು ನಡೆಸಿದ ಹೊನ್ನುಕಾರು ಕ್ಲಬ್ ದಾಳಿ ಉತ್ತರ ಕನ್ನಡ ಜಿಲ್ಲೆಯಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ.

ಸಿದ್ದಾಪುರ ತಾಲೂಕಿನ ಮಳವಳ್ಳಿ ಗ್ರಾಮದ ಹೊನ್ನುಕಾರು ಹೋಂಸ್ಟೇ ಪಕ್ಕದಲ್ಲಿರುವ ಎ.ಜಿ. ರಿಕ್ರಿಯೇಷನ್ ಕ್ಲಬ್ ಮೇಲೆ ಜೂನ್ 5ರ ಮುಂಜಾನೆ ನಡೆಸಿದ ದಾಳಿಯಲ್ಲಿ ಒಟ್ಟು 57 ಮಂದಿಯನ್ನು ಆರೋಪಿಗಳನ್ನಾಗಿ ದಾಖಲಿಸಲಾಗಿದ್ದು, ಸುಮಾರು ₹3.30 ಲಕ್ಷ ನಗದು ಸೇರಿದಂತೆ ಜೂಜಾಟಕ್ಕೆ ಬಳಸಲಾಗುತ್ತಿದ್ದ ಸಾಮಗ್ರಿಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಪ್ರಕರಣದಲ್ಲಿ ಕಟ್ಟಡದ ಮಾಲೀಕರಾಗಿರುವ ಗಣೇಶ ಲಕ್ಷ್ಮಣ ನಾಯ್ಕ್ ಹಾಗೂ ಕ್ಲಬ್ ವ್ಯವಸ್ಥಾಪಕ ಗುರು ಭಟ್ ಸೇರಿದಂತೆ ಒಟ್ಟು 57 ಮಂದಿಯನ್ನು ಆರೋಪಿಗಳನ್ನಾಗಿ ಮಾಡಲಾಗಿದೆ.

ಪೊಲೀಸರು ದಾಖಲಿಸಿರುವ ಮಾಹಿತಿಯ ಪ್ರಕಾರ, ಕ್ಲಬ್‌ನಲ್ಲಿ ಇಸ್ಪೀಟ್ ಎಲೆಗಳ ಜೂಜಾಟಕ್ಕಾಗಿ ವಿಶೇಷ ಟೋಕನ್ ವ್ಯವಸ್ಥೆ ಮಾಡಲಾಗಿತ್ತು ಮತ್ತು ಜೂಜುಕೋರರಿಗೆ ಊಟೋಪಚಾರ ಸೇರಿದಂತೆ ವಿವಿಧ ಸೌಲಭ್ಯಗಳನ್ನು ಒದಗಿಸಲಾಗುತ್ತಿತ್ತು ಎನ್ನಲಾಗಿದೆ.

ಆದರೆ ಈ ಪ್ರಕರಣದಲ್ಲಿ ಅತ್ಯಂತ ಆಘಾತಕಾರಿ ಸಂಗತಿಯೆಂದರೆ, ಬಂಧಿತರಲ್ಲಿ ಗಮನಾರ್ಹ ಸಂಖ್ಯೆಯವರು ಕೃಷಿಕರು ಮತ್ತು ರೈತಾಪಿ ವರ್ಗದವರಾಗಿದ್ದಾರೆ. ಕಾರ್ಗಲ್, ತಲವಾಟ, ಇಡುವಾಣಿ, ನೆಜ್ಜೂರು, ಹೊಸಳ್ಳಿ, ನಾಗೋಡಿ, ಮಳವಳ್ಳಿ, ಗುಂಜಗೋಡ, ಆಡುಕಟ್ಟಾ ಸೇರಿದಂತೆ ಸಾಗರ, ಸಿದ್ದಾಪುರ ಮತ್ತು ಹೊಸನಗರ ಭಾಗಗಳಿಂದ ಬಂದಿರುವ ಸುಮಾರು 20ಕ್ಕೂ ಹೆಚ್ಚು ಮಂದಿ ಕೃಷಿಕರು ಈ ಪ್ರಕರಣದಲ್ಲಿ ಆರೋಪಿಗಳ ಪಟ್ಟಿಯಲ್ಲಿದ್ದಾರೆ.

ಜೆ. ಲೋಕರಾಜ, ಗಣಪತಿ ದೇವಪ್ಪ, ಲಿಂಗರಾಜ ಲಕ್ಷ್ಮಣ, ಅನಂತ ಗಣಪತಿ ಭಟ್, ಕಮಲಾಕರ ಶಿವರಾಮ ಭಟ್, ರಾಜಾರಾಮ ಹರೀ ಭಟ್, ಅಚ್ಚುತ ಶ್ರೀಧರ ರಾಯ್ಕರ್, ಮಂಜುನಾಥ ಮಹಾಬಲಗಿರಿ, ಜಹೀರ್ ಖಾನ್, ಗೋಪಾಲಕೃಷ್ಣ ಮಂಜುನಾಥ, ಗಣೇಶ ಲಕ್ಷ್ಮೀನಾರಾಯಣ ಹೆಗಡೆ, ಚಿನ್ಮಯಿ ಕೃಷ್ಣಮೂರ್ತಿ, ವಿಶ್ವನಾಥ ಗಣಪತಿ ಹೆಗಡೆ, ಶ್ರೀಕಾಂತ ಗಣಪತಿ ಹೆಗಡೆ, ಎಂ.ಜಿ. ವಿಶ್ವನಾಥ, ರಘುಪತಿ ಭಾಸ್ಕರ ಭಟ್, ಶ್ರೀಧರ ಮಹಾಬಲೇಶ್ವರ ಹೆಗಡೆ, ಪ್ರಸನ್ನ ಕೃಷ್ಣ ಹೆಗಡೆ, ಗಣಪತಿ ನಾರಾಯಣ ಹೆಗಡೆ ಸೇರಿದಂತೆ ಹಲವರು ಕೃಷಿಯನ್ನೇ ಅವಲಂಬಿಸಿ ಬದುಕು ಕಟ್ಟಿಕೊಂಡವರು ಎನ್ನಲಾಗಿದೆ.

ಇದು ಕೇವಲ ಜೂಜಾಟದ ಮೇಲಿನ ದಾಳಿಯಲ್ಲ. ಜಿಲ್ಲೆಯ ಕೃಷಿ ಮತ್ತು ಗ್ರಾಮೀಣ ಸಮಾಜದ ಒಳಹೊಕ್ಕಿರುವ ಮತ್ತೊಂದು ಕಳವಳಕಾರಿ ವಾಸ್ತವವನ್ನು ಬಯಲಿಗೆಳೆದ ಘಟನೆ.

ಉತ್ತರ ಕನ್ನಡದಲ್ಲಿ ಕೃಷಿ ಎಂದರೆ ಮೊದಲಿಗೆ ನೆನಪಾಗುವುದು ಅಡಕೆ. ಆದರೆ ಕಳೆದ ಕೆಲವು ವರ್ಷಗಳಿಂದ ಅಡಕೆ ಬೆಳೆಗಾರರು ಎಲೆಚುಕ್ಕಿ ರೋಗ, ಅಸ್ಥಿರ ಮಾರುಕಟ್ಟೆ, ಹೆಚ್ಚುತ್ತಿರುವ ಕಾರ್ಮಿಕ ವೆಚ್ಚ, ಹವಾಮಾನ ವೈಪರೀತ್ಯ ಹಾಗೂ ಉತ್ಪಾದನಾ ಕುಸಿತದಂತಹ ಅನೇಕ ಸಂಕಷ್ಟಗಳನ್ನು ಎದುರಿಸುತ್ತಿದ್ದಾರೆ. ಒಂದು ಕಡೆ ತೋಟ ಉಳಿಸಿಕೊಳ್ಳಲು ರೈತರು ಹೋರಾಡುತ್ತಿದ್ದರೆ, ಮತ್ತೊಂದೆಡೆ ಕೃಷಿಯಿಂದ ಬಂದ ಹಣವೇ ಇಂತಹ ಇಸ್ಪೀಟ್ ಅಡ್ಡೆಗಳಲ್ಲಿ ಕರಗುತ್ತಿರುವುದು ನೋವಿನ ಸಂಗತಿ.

ಇನ್ನೊಂದು ಪ್ರಶ್ನೆಯೂ ಇಲ್ಲಿ ಉದ್ಭವಿಸುತ್ತದೆ. ಇಷ್ಟೊಂದು ದೊಡ್ಡ ಮಟ್ಟದಲ್ಲಿ ಇಸ್ಪೀಟ್ ಕ್ಲಬ್ ನಡೆಯುತ್ತಿದ್ದರೆ, ಇದಕ್ಕೆ ಹಣ ಹರಿಸುತ್ತಿರುವವರು ಯಾರು? ರೈತರು, ಗುತ್ತಿಗೆದಾರರು, ವ್ಯಾಪಾರಿಗಳು, ಪೌರೋಹಿತ್ಯ ವೃತ್ತಿಯವರು ಸೇರಿದಂತೆ ವಿವಿಧ ಕ್ಷೇತ್ರಗಳ ಜನರನ್ನು ಇಂತಹ ಅಡ್ಡೆಗಳಿಗೆ ಸೆಳೆಯುವ ಶಕ್ತಿ ಯಾರದು? ಕೇವಲ ಆಟವಾಡಲು ಬಂದವರು ಮಾತ್ರ ತಪ್ಪಿತಸ್ಥರೇ, ಅಥವಾ ಇಂತಹ ಚಟವನ್ನು ವ್ಯವಸ್ಥಿತವಾಗಿ ಬೆಳೆಸುವ ಜಾಲವೂ ಇದೆಯೇ?

ಸ್ಥಳೀಯರ ಪ್ರಕಾರ, ಈ ಭಾಗದಲ್ಲಿ ಇಂತಹ ಚಟುವಟಿಕೆಗಳು ಹೊಸದಲ್ಲ. ಹಲವು ವರ್ಷಗಳಿಂದ ಇಸ್ಪೀಟ್ ಆಟಗಳು ನಡೆಯುತ್ತಿವೆ ಎಂಬ ಆರೋಪಗಳಿವೆ. ಹಾಗಿದ್ದರೂ ಸ್ಥಳೀಯ ಮಟ್ಟದಲ್ಲಿ ಯಾವುದೇ ಪರಿಣಾಮಕಾರಿ ಕ್ರಮಗಳು ಕಂಡುಬರಲಿಲ್ಲ ಎಂಬ ಮಾತುಗಳು ಕೇಳಿಬರುತ್ತಿವೆ. ಕೊನೆಗೆ ಉಪವಿಭಾಗ ಮಟ್ಟದ ಹಿರಿಯ ಪೊಲೀಸ್ ಅಧಿಕಾರಿಯೇ ನೇರವಾಗಿ ದಾಳಿ ನಡೆಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿರುವುದು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.

ಇಲ್ಲಿ ಮತ್ತೊಂದು ಸಾಮಾಜಿಕ ಆಯಾಮವೂ ಇದೆ. ರೈತರು ವರ್ಷಪೂರ್ತಿ ದುಡಿದು ಗಳಿಸುವ ಹಣ, ಕುಟುಂಬದ ಉಳಿತಾಯ, ಮಕ್ಕಳ ಶಿಕ್ಷಣ, ಕೃಷಿ ಹೂಡಿಕೆಗಳಿಗೆ ಬಳಸಬೇಕಾದ ಸಂಪನ್ಮೂಲಗಳು ಜೂಜಾಟದ ಅಡ್ಡೆಗಳಲ್ಲಿ ಕಳೆದುಹೋದರೆ ಅದರ ಪರಿಣಾಮ ಕೇವಲ ಒಬ್ಬ ವ್ಯಕ್ತಿಯ ಮೇಲೆ ಬೀಳುವುದಿಲ್ಲ. ಇಡೀ ಕುಟುಂಬ ಮತ್ತು ಗ್ರಾಮೀಣ ಆರ್ಥಿಕತೆಯ ಮೇಲೆಯೇ ಅದರ ಹೊರೆ ಬೀಳುತ್ತದೆ. ಹಣ ಕಳೆದುಕೊಳ್ಳುವುದು ಒಂದು ಭಾಗವಾದರೆ, ಸಮಾಜದಲ್ಲಿ ಗಳಿಸಿದ್ದ ಗೌರವ ಮತ್ತು ಮರ್ಯಾದೆ ಕಳೆದುಕೊಳ್ಳುವುದು ಮತ್ತೊಂದು ಭಾಗ.

ಹೊನ್ನುಕಾರು ಕ್ಲಬ್ ದಾಳಿ ಕಾನೂನು ಜಾರಿಯ ಯಶಸ್ವಿ ಕಾರ್ಯಾಚರಣೆಯಾಗಿರಬಹುದು. ಆದರೆ ಅದಕ್ಕಿಂತ ದೊಡ್ಡ ಪ್ರಶ್ನೆ ಏನೆಂದರೆ, ಎಲೆಚುಕ್ಕಿ ರೋಗದಿಂದ ಬಳಲುತ್ತಿರುವ ಅಡಕೆ ತೋಟಗಳ ನಡುವೆ, ರೈತರ ಬದುಕಿನ ಸಂಕಷ್ಟಗಳ ನಡುವೆ, ಕೃಷಿಯಿಂದ ಬಂದ ಹಣವನ್ನು ಇಸ್ಪೀಟ್ ಮೇಜಿನ ಮೇಲೆ ಸುರಿಯುವ ಪರಿಸ್ಥಿತಿ ಏಕೆ ನಿರ್ಮಾಣವಾಗಿದೆ? ಮತ್ತು ಅದಕ್ಕೆ ಪ್ರೇರಣೆ ನೀಡುತ್ತಿರುವವರು ಯಾರು?

ಈ ಪ್ರಶ್ನೆಗಳಿಗೆ ಉತ್ತರ ಹುಡುಕದೆ ಹೋದರೆ, ಹೊನ್ನುಕಾರು ಕ್ಲಬ್ ಮೇಲೆ ನಡೆದ ದಾಳಿ ಒಂದು ಪೊಲೀಸ್ ಸುದ್ದಿಯಾಗಿ ಮಾತ್ರ ಉಳಿಯುತ್ತದೆ. ಗ್ರಾಮೀಣ ಸಮಾಜದೊಳಗೆ ಬೇರುಬಿಟ್ಟಿರುವ ಸಮಸ್ಯೆಯನ್ನು ಗುರುತಿಸಿ ಅದನ್ನು ತಡೆಗಟ್ಟುವ ಪ್ರಯತ್ನವಾಗುವುದಿಲ್ಲ.