ಯಲ್ಲಾಪುರ: ಯಲ್ಲಾಪುರ ತಾಲೂಕಿನ ವಜ್ರಳ್ಳಿಯಲ್ಲಿ ರಸ್ತೆ ಕಾಮಗಾರಿಗಾಗಿ ಸಂಗ್ರಹಿಸಿಟ್ಟಿದ್ದ ಕಡಿ ಹಾಗೂ ಎಂ-ಸ್ಯಾಂಡ್ ಅನ್ನು ಕಳ್ಳತನ ಮಾಡಿರುವ ಘಟನೆ ಬೆಳಕಿಗೆ ಬಂದಿದ್ದು, ಸುಮಾರು ರೂ.36 ಸಾವಿರ ಮೌಲ್ಯದ ಸಾಮಗ್ರಿ ಕಳವಾಗಿರುವುದಾಗಿ ಮುಂಡಗೋಡದ ಗುತ್ತಿಗೆದಾರ ನಜೀರ್ ಅಹಮದ್ ದಾವಲ್‌ಸಾಬ್ ಕಬನೂರ ಯಲ್ಲಾಪುರ ಪೊಲೀಸರಿಗೆ ದೂರು ನೀಡಿದ್ದಾರೆ.
ರಸ್ತೆ ಕಾಮಗಾರಿಯ ಉದ್ದೇಶಕ್ಕಾಗಿ ಯಲ್ಲಾಪುರ ತಾಲೂಕಿನ ವಜ್ರಳ್ಳಿಯಲ್ಲಿ 2025ರ ಡಿಸೆಂಬರ್‌ನಿಂದ ವಿವಿಧ ರೀತಿಯ ಕಡಿ ಹಾಗೂ ಎಂ-ಸ್ಯಾಂಡ್‌ಗಳನ್ನು ದಾಸ್ತಾನು ಮಾಡಲಾಗಿತ್ತು. 10 ಲಾರಿ 20 ಎಂಎಂ ಕಡಿ, 10 ಲಾರಿ ಎಂ-ಸ್ಯಾಂಡ್ ಹಾಗೂ 6 ಲಾರಿ 40 ಎಂಎಂ ಕಡಿ ದಾಸ್ತಾನಿನಲ್ಲಿ ಇತ್ತು ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಆದರೆ, ಈ ದಾಸ್ತಾನಿನಿಂದ ಸುಮಾರು ನಾಲ್ಕು ಟ್ರ್ಯಾಕ್ಟರ್‌ಗಳಷ್ಟು 20 ಎಂಎಂ ಕಡಿ ಹಾಗೂ ನಾಲ್ಕು ಟ್ರ್ಯಾಕ್ಟರ್‌ಗಳಷ್ಟು ಎಂ-ಸ್ಯಾಂಡ್ ನಾಪತ್ತೆಯಾಗಿರುವುದು ಗಮನಕ್ಕೆ ಬಂದಿದೆ. ಯಾರೋ ಕಳ್ಳರು ಸಾಮಗ್ರಿಗಳನ್ನು ಕಳವು ಮಾಡಿಕೊಂಡು ಹೋಗಿರುವುದಾಗಿ ನಜೀರ್ ಅಹಮದ್ ದೂರಿನಲ್ಲಿ ಆರೋಪಿಸಿದ್ದಾರೆ.
ಕಳವಾಗಿರುವ 20 ಎಂಎಂ ಕಡಿಯ ಅಂದಾಜು ಮೌಲ್ಯ ರೂ.20 ಸಾವಿರ ಹಾಗೂ ಎಂ-ಸ್ಯಾಂಡ್‌ನ ಮೌಲ್ಯ ರೂ.16 ಸಾವಿರ ಎಂದು ತಿಳಿಸಲಾಗಿದ್ದು, ಒಟ್ಟಾರೆ ರೂ.36 ಸಾವಿರ ಮೌಲ್ಯದ ಸಾಮಗ್ರಿ ಕಳವಾಗಿರುವುದಾಗಿ ದೂರು ದಾಖಲಾಗಿದೆ.
ರಸ್ತೆ ಕಾಮಗಾರಿಗೆ ಬಳಸಬೇಕಿದ್ದ ಸಾಮಗ್ರಿಯೇ ದಾಸ್ತಾನಿನಿಂದ ಮಾಯವಾಗಿರುವುದು ಪ್ರಕರಣದ ವಿಶೇಷತೆಯಾಗಿದೆ. ಕಳವು ಯಾವ ಅವಧಿಯಲ್ಲಿ ನಡೆದಿದೆ ಹಾಗೂ ಸಾಮಗ್ರಿಯನ್ನು ಹೇಗೆ ಸಾಗಿಸಲಾಗಿದೆ ಎಂಬುದರ ಕುರಿತು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಈ ಸಂಬಂಧ ಯಲ್ಲಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
