ಕುಮಟಾ: ಎಲೆಕ್ಟ್ರಿಕಲ್ಸ್ ಅಂಗಡಿಯೊಂದರ ಬಾಗಿಲು ಮುರಿದು ಒಳನುಗ್ಗಿದ ಕಳ್ಳರು ನಗದು ಹಾಗೂ ಹಳೆಯ ತಾಮ್ರದ ತಂತಿಗಳನ್ನು ಕಳವು ಮಾಡಿಕೊಂಡು ಪರಾರಿಯಾಗಿರುವ ಘಟನೆ ಕುಮಟಾ ಪಟ್ಟಣದ ನೆಲ್ಲಿಕೇರಿಯಲ್ಲಿ ನಡೆದಿದೆ.
ಸೆ.24ರ ರಾತ್ರಿ 8 ಗಂಟೆಯಿಂದ ಸೆ.25ರ ಬೆಳಿಗ್ಗೆ 6.30ರ ನಡುವಿನ ಅವಧಿಯಲ್ಲಿ ನೆಲ್ಲಿಕೇರಿ ಟೆಂಪೋ ಸ್ಟ್ಯಾಂಡ್ ಬಳಿ ಇರುವ ‘ಶ್ರೀ ಗಣೇಶ ಎಲೆಕ್ಟ್ರಿಕಲ್ಸ್’ ಅಂಗಡಿಯಲ್ಲಿ ಕಳ್ಳತನ ನಡೆದಿದೆ. ಅಂಗಡಿಯ ಶಟರ್ ಮುರಿದು ಒಳನುಗ್ಗಿದ ಕಳ್ಳರು, ಗಲ್ಲಾಪೆಟ್ಟಿಗೆ ಮುರಿದು ಅದರಲ್ಲಿದ್ದ ರೂ.100 ನಗದು ಹಾಗೂ ಸುಮಾರು 20 ಕೆ.ಜಿ. ತೂಕದ ಹಳೆಯ ತಾಮ್ರದ ತಂತಿಗಳನ್ನು ಚೀಲದ ಸಮೇತ ಕಳವು ಮಾಡಿಕೊಂಡು ಹೋಗಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಈ ಕುರಿತು ಅಂಗಡಿ ಮಾಲೀಕ, ಹೆಗಡೆ-ರಟ್ಟೆಕಂಬಿಯ ಭಾಸ್ಕರ ರಾಮ ನಾಯ್ಕ ಅವರು ನೀಡಿದ ದೂರಿನ ಮೇರೆಗೆ ಕುಮಟಾ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
