ಮುಂಡಗೋಡ: ತಂಪು ಪಾನೀಯವೆಂದು ಭಾವಿಸಿ ಕಳೆನಾಶಕ ದ್ರವ ಸೇವಿಸಿದ ವ್ಯಕ್ತಿಯೊಬ್ಬರು ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟ ಘಟನೆ ಪಟ್ಟಣದ ಕಿಲ್ಲೆ ಓಣಿಯಲ್ಲಿ ನಡೆದಿದೆ.
ಕಿಲ್ಲೆ ಓಣಿಯ ನಿವಾಸಿ ಮೌಲಾಲಿ ಬನ್ನುರ (52) ಮೃತಪಟ್ಟವರು. ಅ. 8ರಂದು ಸಂಜೆ ಮನೆಯ ಹಿತ್ತಿಲಲ್ಲಿ ಕಸ ತೆಗೆಯುತ್ತಿದ್ದ ವೇಳೆ, ಈ ಹಿಂದೆ ಕಳೆ ತೆಗೆಯಲು ಬಳಸಿದ ಕಳೆನಾಶಕದ ಉಳಿದ ದ್ರವವನ್ನು ಹಸಿರು ಬಾಟಲಿಯಲ್ಲಿ ತಾವೇ ತುಂಬಿಸಿ ಇಟ್ಟಿದ್ದನ್ನು ಮರೆತು ಅದನ್ನು ತಂಪು ಪಾನೀಯವೆಂದು ಭಾವಿಸಿ ಆಕಸ್ಮಿಕವಾಗಿ ಸೇವಿಸಿದ್ದಾರೆ ಎನ್ನಲಾಗಿದೆ.
ಅಸ್ವಸ್ಥಗೊಂಡ ಅವರನ್ನು ಮುಂಡಗೋಡ ಸಾರ್ವಜನಿಕ ಆಸ್ಪತ್ರೆಗೆ ದಾಖಲಿಸಿ, ಹೆಚ್ಚಿನ ಚಿಕಿತ್ಸೆಗಾಗಿ ಹುಬ್ಬಳ್ಳಿಯ ಕಿಮ್ಸ್ ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ಅಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಅವರು ಅ. 11ರಂದು ಸಂಜೆ 6.10ರ ಸುಮಾರಿಗೆ ಮೃತಪಟ್ಟಿದ್ದಾರೆ ಎಂದು ವೈದ್ಯರು ತಿಳಿಸಿರುವುದಾಗಿ ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ಮೃತರ ಪುತ್ರ ಹಜರೆಸಾಬ ಬನ್ನುರ ನೀಡಿದ ದೂರಿನ ಮೇರೆಗೆ ಮುಂಡಗೋಡ ಪೊಲೀಸ್ ಠಾಣೆಯಲ್ಲಿ ಅಸ್ವಾಭಾವಿಕ ಮರಣ ಪ್ರಕರಣ ದಾಖಲಾಗಿದೆ. ತಂದೆಯ ಸಾವಿನಲ್ಲಿ ಯಾವುದೇ ಸಂಶಯವಿಲ್ಲ ಎಂದು ದೂರಿನಲ್ಲಿ ತಿಳಿಸಿರುವುದಾಗಿ ಪೊಲೀಸರು ದಾಖಲಿಸಿದ್ದಾರೆ.
