ಭಾರತದ ಟೀ ಎಸ್ಟೇಟ್ಗಳು ಜಗತ್ತಿನಲ್ಲೇ ಅತ್ಯುತ್ತಮ ಮತ್ತು ಅಪರೂಪದ ಟೀ ಎಲೆಗಳನ್ನು ಉತ್ಪಾದಿಸುತ್ತವೆ. ಇವು ಸಾಮಾನ್ಯ ದಿನನಿತ್ಯದ ಚಹಾಗಳಲ್ಲ. ಸೀಮಿತ ಪ್ರಮಾಣದಲ್ಲಿ ತಯಾರಾಗಿ ಹರಾಜು ಮೌಲ್ಯದಲ್ಲಿ ಮಾರಾಟವಾಗುವ ಐಷಾರಾಮಿ ಚಹಾ. ಅವುಗಳಲ್ಲಿ ಅಸ್ಸಾಂನ ಮನೋಹರಿ ಗೋಲ್ಡ್ ಟೀ ಭಾರತದಲ್ಲೇ ಅತ್ಯಂತ ದುಬಾರಿ ಟೀ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
2022ರಲ್ಲಿ ಗುವಾಹಟಿ ಹರಾಜಿನಲ್ಲಿ ಈ ಟೀ 1.15 ಲಕ್ಷ ರೂ ಪ್ರತಿ ಕೆಜಿ ದರಕ್ಕೆ ಮಾರಾಟವಾಗಿ ದಾಖಲೆ ನಿರ್ಮಿಸಿತು. ಚಿನ್ನದಂತೆ ಹೊಳೆಯುವ ಮೊಗ್ಗುಗಳನ್ನು ಕೈಯಾರೆ ಕಿತ್ತ ಸಂಗ್ರಹಿಸುವುದರಿಂದ ಇದನ್ನು “ಗೋಲ್ಡ್” ಎಂದು ಕರೆಯಲಾಗುತ್ತದೆ. ಅತಿ ಸೀಮಿತ ಉತ್ಪಾದನೆ, ಉನ್ನತ ಗುಣಮಟ್ಟ ಮತ್ತು ಅಪರೂಪದ ಹರಾಜು ಬೇಡಿಕೆ ಇವೆಲ್ಲವೂ ಇದರ ಬೆಲೆಯನ್ನು ಗಗನಕ್ಕೇರಿಸುತ್ತವೆ.
ಭಾರತದಲ್ಲಿ ದುಬಾರಿ ಟೀಗಳ ಪಟ್ಟಿಯಲ್ಲಿ ಡಾರ್ಜಿಲಿಂಗ್ನ ಪ್ರಸಿದ್ಧ ಫಸ್ಟ್ ಫ್ಲಷ್ ಟೀ ಕೂಡ ಪ್ರಮುಖ ಸ್ಥಾನದಲ್ಲಿದೆ. ಡಾರ್ಜಿಲಿಂಗ್ ಪರ್ವತ ಪ್ರದೇಶದಲ್ಲಿ ವಸಂತ ಋತುವಿನ ಆರಂಭದಲ್ಲಿ ಕಿತ್ತ ಈ ಟೀ ಹಗುರವಾದ ಹೂವಿನ ಸುವಾಸನೆ ಮತ್ತು ವಿಶಿಷ್ಠ ರುಚಿಗೆ ಹೆಸರುವಾಸಿ. ಉತ್ತಮ ಎಸ್ಟೇಟ್ಗಳ ಟೀಗಳು 100 ಗ್ರಾಂಗೆ ಸಾವಿರಾರು ರೂಪಾಯಿ ದರ ತಲುಪುತ್ತವೆ. ಇದೇ ಪ್ರದೇಶದ ಮಾಕೈಬಾರಿ ಟೀ ಎಸ್ಟೇಟ್ ಉತ್ಪಾದಿಸುವ ‘ಸಿಲ್ವರ್ ಟಿಪ್ಸ್ ಇಂಪೀರಿಯಲ್’ ಪೂರ್ಣಚಂದ್ರನಿರುವ ರಾತ್ರಿ ಸಂಗ್ರಹವಾಗುವ ವಿಶೇಷ ಟೀ. ಅತಿ ಕಡಿಮೆ ಪ್ರಮಾಣದಲ್ಲಿ ತಯಾರಾಗುವುದರಿಂದ ಇದು ಚಹಾ ಪ್ರಿಯರಲ್ಲಿ ಅಪಾರ ಬೇಡಿಕೆ ಹೊಂದಿದೆ.
ಉತ್ತರ-ಪೂರ್ವ ಭಾರತದ ವಿವಿಧ ತೋಟಗಳಲ್ಲಿ ಉತ್ಪಾದನೆಯಾಗುವ ‘ಗೋಲ್ಡನ್ ನೀಡಲ್’ ಟೀ ಕೂಡ ಅಪರೂಪದ ಮೊಗ್ಗುಗಳಿಂದ ಮಾತ್ರ ತಯಾರಾಗುತ್ತದೆ. ಅತ್ಯುತ್ತಮ ಋತುವಿನಲ್ಲಿ ಮಾತ್ರ ಉತ್ಪಾದನೆ ನಡೆಯುವುದರಿಂದ ಇದರ ಬೆಲೆ ಹರಾಜುಗಳಲ್ಲಿ ಲಕ್ಷಾಂತರ ರೂ.ಗಳಿಗೆ ಏರಿದೆ. ಅಸ್ಸಾಂ ಆರ್ಥೋಡಾಕ್ಸ್ ಗೋಲ್ಡನ್ ಟಿಪ್ಸ್ ಟೀಗಳು ಶ್ರೀಮಂತ ರುಚಿ ಮತ್ತು ಕೈಗಾರಿಕಾ ಸಂಸ್ಕರಣೆಯ ಕಾರಣದಿಂದ 70 ಸಾವಿರ ರೂ ಪ್ರತಿ ಕೆಜಿ ದಾಟಿದ ಉದಾಹರಣೆಗಳಿವೆ.
ಈ ಎಲ್ಲಾ ಟೀಗಳ ಸಾಮಾನ್ಯ ಲಕ್ಷಣವೆಂದರೆ, ಸೀಮಿತ ಉತ್ಪಾದನೆ, ಅಪರೂಪದ ಹವಾಮಾನ ಪರಿಸ್ಥಿತಿ, ಐತಿಹಾಸಿಕ ಹಿನ್ನೆಲೆ ಮತ್ತು ಹರಾಜು ಮೌಲ್ಯ. ಇವು ದಿನನಿತ್ಯ ಕುಡಿಯುವ ಚಹಾಗಳಲ್ಲ. ರುಚಿ, ಮೂಲ ಮತ್ತು ಕಥೆಗೆ ಮೌಲ್ಯ ನೀಡುವ ಟೀ ರಸಿಕರು ಮತ್ತು ಸಂಗ್ರಹಕಾರರು ಖರೀದಿಸುವ ಐಷಾರಾಮಿ ಉತ್ಪನ್ನಗಳು. ಭಾರತದಲ್ಲಿ ಉತ್ಪಾದನೆಯಾಗುವ ಈ ಅಪರೂಪದ ಟೀಗಳು ಜಾಗತಿಕ ಮಾರುಕಟ್ಟೆಯಲ್ಲಿ ವೈಭವದ ಸಂಕೇತಗಳಾಗಿ ಪರಿಣಮಿಸಿದ್ದು, ಚಹಾ ಎಂಬ ಪಾನೀಯವೂ ಒಂದು ಸಂಸ್ಕೃತಿಯ ರೂಪವಾಗಿ ಹೇಗೆ ಬೆಳೆದಿದೆ ಎಂಬುದಕ್ಕೆ ಉದಾಹರಣೆ.
