ಮುನ್ನೆಚ್ಚರಿಕೆ ಪಾಲಿಸಿ, ಸಿಡಿಲಿನಿಂದ ರಕ್ಷಿಸಿಕೊಳ್ಳಿ

ಮುಂಗಾರು ಪೂರ್ವ ಹಾಗೂ ಮುಂಗಾರು ಅವಧಿಯಲ್ಲಿ ಗುಡುಗು-ಸಿಡಿಲು ಸಾಮಾನ್ಯವಾಗಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತದೆ. ವಿಶೇಷವಾಗಿ ಮಧ್ಯಾಹ್ನ ಮತ್ತು ಸಂಜೆ ವೇಳೆಯಲ್ಲಿ ಸಿಡಿಲು ಸಂಭವಿಸುವ ಸಾಧ್ಯತೆ ಹೆಚ್ಚು.
ಇಂತಹ ಸಂದರ್ಭಗಳಲ್ಲಿ ಸ್ವಲ್ಪ ನಿರ್ಲಕ್ಷ್ಯ ಮಾಡಿದರೂ ಜೀವಕ್ಕೇ ಅಪಾಯ ತಂದೊಡ್ಡಬಹುದು. ಆದ್ದರಿಂದ ಗುಡುಗು-ಸಿಡಿಲಿನ ಸಮಯದಲ್ಲಿ ಸರಿಯಾದ ಮುನ್ನೆಚ್ಚರಿಕೆ ಕ್ರಮಗಳನ್ನು ಪಾಲಿಸುವುದು ಅತ್ಯಂತ ಅಗತ್ಯ.
ಸಿಡಿಲು ಸಾಮಾನ್ಯ ಪ್ರಕೃತಿ ವಿಕೋಪವಾಗಿದ್ದರೂ, ಅದರ ಪರಿಣಾಮಗಳು ತೀವ್ರವಾಗಿರಬಹುದು. ಕೃಷಿ ಕೆಲಸದಲ್ಲಿ ತೊಡಗಿರುವವರು, ಜಾನುವಾರು ಮೇಯಿಸುವವರು, ಮೀನುಗಾರರು, ಹೊರಾಂಗಣದಲ್ಲಿ ಕೆಲಸ ಮಾಡುವವರು ಹಾಗೂ ಪ್ರಯಾಣಿಕರು ವಿಶೇಷ ಎಚ್ಚರಿಕೆ ವಹಿಸಬೇಕು.
ಗುಡುಗು-ಸಿಡಿಲಿನ ಸಂದರ್ಭದಲ್ಲಿ ಹೊರಗೆ ಹೋಗುವ ಅನಿವಾರ್ಯತೆ ಇದ್ದರೆ ಮೊದಲು ಹವಾಮಾನ ಮುನ್ಸೂಚನೆಗಳನ್ನು ಗಮನಿಸಬೇಕು. ಮೊಬೈಲ್ನಲ್ಲಿ Common Alerting Protocol (CAP) ಮೂಲಕ ಬರುವ ಎಚ್ಚರಿಕೆ ಸಂದೇಶಗಳನ್ನು ಪರಿಶೀಲಿಸುವುದು ಮುಖ್ಯ. ಪ್ರತಿಕೂಲ ಹವಾಮಾನವಿದ್ದರೆ ಕೃಷಿ ಕೆಲಸ, ಮೀನುಗಾರಿಕೆ, ದೋಣಿ ಸಂಚಾರ ಅಥವಾ ಅನಗತ್ಯ ಪ್ರಯಾಣವನ್ನು ತಪ್ಪಿಸುವುದು ಉತ್ತಮ.
ಲೋಹದ ತಗಡಿನಿಂದ ನಿರ್ಮಿತ ಮನೆಗಳು ಸುರಕ್ಷಿತವಲ್ಲ. ಅಂತಹ ಸಂದರ್ಭಗಳಲ್ಲಿ ಗಟ್ಟಿಯಾದ ಸುರಕ್ಷಿತ ಕಟ್ಟಡಗಳಲ್ಲಿ ಆಶ್ರಯ ಪಡೆಯಬೇಕು. ಬೆಟ್ಟ, ಪರ್ವತ, ಶಿಖರಗಳಂತಹ ಎತ್ತರ ಪ್ರದೇಶಗಳಿಂದ ತಕ್ಷಣ ಕೆಳಗಿಳಿದು ಸುರಕ್ಷಿತ ತಗ್ಗು ಪ್ರದೇಶದಲ್ಲಿ ಆಶ್ರಯ ಪಡೆಯಬೇಕು. ಆದರೆ ಪ್ರವಾಹ ಬರುವ ಸಾಧ್ಯತೆ ಇಲ್ಲದ ಪ್ರದೇಶವನ್ನೇ ಆಯ್ಕೆ ಮಾಡಬೇಕು.
ಕೆರೆ, ನದಿ, ಕೊಳಗಳಂತಹ ನೀರಿನ ಮೂಲಗಳಿಂದ ದೂರವಿರಬೇಕು. ವಿದ್ಯುತ್ ಕಂಬಗಳು, ಟೆಲಿಫೋನ್ ಕಂಬಗಳು, ಮೊಬೈಲ್ ಟವರ್ಗಳು, ಪವನ ವಿದ್ಯುತ್ ಗೋಪುರಗಳು, ರೈಲು ಹಳಿಗಳು ಮತ್ತು ವಿದ್ಯುತ್ ಉಪಕರಣಗಳಿಂದ ದೂರ ಇರಬೇಕು. ಇವುಗಳು ಸಿಡಿಲನ್ನು ಆಕರ್ಷಿಸುವ ಸಾಧ್ಯತೆ ಹೆಚ್ಚಾಗಿರುತ್ತದೆ.
ವಾಹನ ಚಾಲನೆಯಲ್ಲಿದ್ದರೆ ತಕ್ಷಣ ವಾಹನ ನಿಲ್ಲಿಸಿ ಅದರೊಳಗೇ ಆಶ್ರಯ ಪಡೆಯುವುದು ಸುರಕ್ಷಿತ. ಹೊರಾಂಗಣದಲ್ಲಿ ಸುರಕ್ಷಿತ ಸ್ಥಳ ಸಿಗದಿದ್ದರೆ ಎರಡು ಕಾಲುಗಳನ್ನು ಜೋಡಿಸಿ ಮಂಡಿಯೂರಿ ಕುಳಿತು ತಲೆಯನ್ನು ಬಗ್ಗಿಸಿ, ಕಿವಿಗಳನ್ನು ಕೈಗಳಿಂದ ಮುಚ್ಚಿಕೊಳ್ಳಬೇಕು.
ಮರಗಳ ಕೆಳಗೆ, ವಿಶೇಷವಾಗಿ ದೊಡ್ಡ ಮರಗಳ ಕೆಳಗೆ ಆಶ್ರಯ ಪಡೆಯಬಾರದು. ಅರಣ್ಯ ಪ್ರದೇಶದಲ್ಲಿದ್ದರೆ ಚಿಕ್ಕ ಮರಗಳ ಕೆಳಗೆ ಮಾತ್ರ ತಾತ್ಕಾಲಿಕ ಆಶ್ರಯ ಪಡೆಯಬಹುದು. ದ್ವಿಚಕ್ರ ವಾಹನಗಳು, ತಂತಿಬೇಲಿ, ಯಂತ್ರಗಳು, ಲೋಹದ ವಸ್ತುಗಳು ಹಾಗೂ ಕಬ್ಬಿಣದ ಸರಳುಗಳಿರುವ ಛತ್ರಿಗಳನ್ನು ಬಳಸಬಾರದು.
ಸಿಡಿಲಿನ ಸಮಯದಲ್ಲಿ ಮೊಬೈಲ್ ಫೋನ್ ಬಳಕೆ ತಪ್ಪಿಸುವುದು ಉತ್ತಮ. ಮನೆಯೊಳಗಿದ್ದರೆ ಕಿಟಕಿ, ಬಾಗಿಲುಗಳನ್ನು ಮುಚ್ಚಿ, ವಿದ್ಯುತ್ ಸಂಪರ್ಕ ಹೊಂದಿರುವ ದೂರವಾಣಿ ಹಾಗೂ ವಿದ್ಯುತ್ ಸಾಧನಗಳಿಂದ ದೂರವಿರಬೇಕು. ಈ ಸಮಯದಲ್ಲಿ ಸ್ನಾನ, ಶವರ್, ಪಾತ್ರೆ ತೊಳೆಯುವುದು, ಬಟ್ಟೆ ಒಗೆಯುವುದು ಕೂಡ ಅಪಾಯಕಾರಿಯಾಗಬಹುದು.
ಮಕ್ಕಳು, ವಯೋವೃದ್ಧರು ಹಾಗೂ ಜಾನುವಾರುಗಳನ್ನು ಸುರಕ್ಷಿತ ಸ್ಥಳದಲ್ಲಿ ಇರಿಸುವುದು ಮುಖ್ಯ. ಆಟದ ಮೈದಾನ, ಉದ್ಯಾನವನ, ಈಜುಕೊಳ, ಕಡಲ ತೀರ, ದೋಣಿ ವಿಹಾರ ಮತ್ತು ತೆರೆಯಾದ ಪ್ರದೇಶಗಳಿಗೆ ಹೋಗುವುದನ್ನು ತಪ್ಪಿಸಬೇಕು.
ಅರಣ್ಯ ಪ್ರದೇಶಗಳಲ್ಲಿ ಮಿಂಚಿನ ಹೊಡೆತದಿಂದ ಕಾಡ್ಗಿಚ್ಚು ಸಂಭವಿಸುವ ಸಾಧ್ಯತೆ ಇರುವುದರಿಂದ ಗಿಡಗಂಟಿಗಳಿಲ್ಲದ ಸ್ವಚ್ಛ ಪ್ರದೇಶಕ್ಕೆ ತೆರಳಬೇಕು.
ಸಿಡಿಲು ಒಂದು ಕ್ಷಣದ ಅಪಾಯವಾದರೂ, ಅದರ ಪರಿಣಾಮ ಜೀವಪರ್ಯಂತ ಉಳಿಯಬಹುದು. ಆದ್ದರಿಂದ “ಮುನ್ನೆಚ್ಚರಿಕೆಯೇ ಸುರಕ್ಷತೆ” ಎಂಬುದನ್ನು ಗಮನದಲ್ಲಿಟ್ಟುಕೊಂಡು ಪ್ರತಿಯೊಬ್ಬರೂ ಜಾಗೃತರಾಗಿರಬೇಕು.