ರೈಲಿನಲ್ಲಿ ಬೈಕ್‌, ಸ್ಕೂಟರ್ ಕಳಿಸೋದು ಹೇಗೆ?

ಪ್ರಯಾಣಿಕರಿಗೆ ಉಪಯುಕ್ತ ಸಂಪೂರ್ಣ ಮಾಹಿತಿ

ಇಂದಿನ ವೇಗದ ಜೀವನಶೈಲಿಯಲ್ಲಿ ಉದ್ಯೋಗ, ಶಿಕ್ಷಣ, ವ್ಯಾಪಾರ, ವರ್ಗಾವಣೆ, ಪ್ರವಾಸ ಅಥವಾ ವೈಯಕ್ತಿಕ ಕಾರಣಗಳಿಂದ ಒಂದು ನಗರದಿಂದ ಮತ್ತೊಂದು ನಗರಕ್ಕೆ, ಕೆಲವೊಮ್ಮೆ ಒಂದು ರಾಜ್ಯದಿಂದ ಇನ್ನೊಂದು ರಾಜ್ಯಕ್ಕೂ ತೆರಳಬೇಕಾಗುತ್ತದೆ.

ಇಂತಹ ಸಂದರ್ಭದಲ್ಲಿ ತಮ್ಮ ಬೈಕ್ ಅಥವಾ ಸ್ಕೂಟರ್ ಅನ್ನು ಜೊತೆಗೆ ಕೊಂಡೊಯ್ಯುವುದು ಅನೇಕ ಮಂದಿಗೆ ದೊಡ್ಡ ಸವಾಲಾಗುತ್ತದೆ. ನೂರಾರು ಕಿಲೋಮೀಟರ್ ದೂರ ವಾಹನ ಓಡಿಸಿಕೊಂಡು ಹೋಗುವುದು ಕಷ್ಟಕರ ಮಾತ್ರವಲ್ಲ, ಸಮಯ, ಇಂಧನ ವೆಚ್ಚ ಹಾಗೂ ದೈಹಿಕ ಆಯಾಸಕ್ಕೂ ಕಾರಣವಾಗುತ್ತದೆ. ಲಾರಿ ಅಥವಾ ಖಾಸಗಿ ಸಾಗಣೆ ಸೇವೆಗಳು ಕೆಲವೊಮ್ಮೆ ದುಬಾರಿ ಆಗಬಹುದು.

ಇಂತಹ ಸಂದರ್ಭಗಳಲ್ಲಿ ಭಾರತೀಯ ರೈಲ್ವೆಯ ಪಾರ್ಸೆಲ್ ಹಾಗೂ ಲಾಗೇಜ್ ಸೇವೆ ಅತ್ಯಂತ ಉಪಯುಕ್ತ ಮತ್ತು ಕೈಗೆಟುಕುವ ಆಯ್ಕೆಯಾಗಿದೆ. ಸುರಕ್ಷಿತವಾಗಿ, ಕಡಿಮೆ ವೆಚ್ಚದಲ್ಲಿ ಮತ್ತು ನಂಬಿಕಸ್ಥ ರೀತಿಯಲ್ಲಿ ಬೈಕ್ ಅಥವಾ ಸ್ಕೂಟರ್ ಅನ್ನು ಗಮ್ಯಸ್ಥಾನಕ್ಕೆ ಕಳುಹಿಸಲು ರೈಲ್ವೆ ಅವಕಾಶ ಒದಗಿಸಿದೆ.

ಆದರೆ ಈ ಸೇವೆಯನ್ನು ಹೇಗೆ ಬಳಸಬೇಕು, ಯಾವ ದಾಖಲೆಗಳು ಬೇಕು, ಶುಲ್ಕ ಎಷ್ಟು, ಯಾವ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳಬೇಕು ಎಂಬುದರ ಬಗ್ಗೆ ಹಲವರಿಗೆ ಸ್ಪಷ್ಟ ಮಾಹಿತಿ ಇರುವುದಿಲ್ಲ. ಆದ್ದರಿಂದ ರೈಲಿನಲ್ಲಿ ಬೈಕ್ ಕಳುಹಿಸುವ ಸಂಪೂರ್ಣ ವಿಧಾನವನ್ನು ತಿಳಿದುಕೊಳ್ಳುವುದು ಅಗತ್ಯವಾಗಿದೆ.

ಭಾರತೀಯ ರೈಲ್ವೆಯಲ್ಲಿ ಬೈಕ್ ಅಥವಾ ಸ್ಕೂಟರ್ ಸಾಗಿಸಲು ಮುಖ್ಯವಾಗಿ ಎರಡು ವಿಧಾನಗಳಿವೆ. ಮೊದಲನೆಯದು ಪಾರ್ಸೆಲ್‌ ಸೇವೆ. ಈ ವಿಧಾನದಲ್ಲಿ ನೀವು ಸ್ವತಃ ಪ್ರಯಾಣಿಸದಿದ್ದರೂ ನಿಮ್ಮ ವಾಹನವನ್ನು ರೈಲಿನ ಮೂಲಕ ಕಳುಹಿಸಬಹುದು.

ಎರಡನೆಯದು ಲಗೇಜ್‌ ಸೇವೆ. ನೀವು ಪ್ರಯಾಣಿಸುವ ರೈಲಿನಲ್ಲೇ ನಿಮ್ಮ ವಾಹನವನ್ನು ಕಳುಹಿಸುವ ವ್ಯವಸ್ಥೆ ಇದಾಗಿದೆ. ಈ ಸಂದರ್ಭದಲ್ಲಿ ನಿಮ್ಮ ಮಾನ್ಯ ರೈಲು ಟಿಕೆಟ್ ಅಗತ್ಯವಾಗುತ್ತದೆ. ಪ್ರಯಾಣಿಕರು ತಮ್ಮ ಅವಶ್ಯಕತೆಗೆ ತಕ್ಕಂತೆ ಯಾವುದೇ ವಿಧಾನವನ್ನು ಆಯ್ಕೆ ಮಾಡಬಹುದು.

ವಾಹನ ಬುಕ್ಕಿಂಗ್ ಮಾಡಲು ಕೆಲವು ಪ್ರಮುಖ ದಾಖಲೆಗಳು ಅಗತ್ಯ. ವಾಹನದ ನೋಂದಣಿ ಪ್ರಮಾಣಪತ್ರ (ಆರ್‌ಸಿ ಬುಕ್), ಚಾಲ್ತಿಯಲ್ಲಿರುವ ಇನ್ಸುರನ್ಸ್ ಪತ್ರ, ಆಧಾರ್ ಕಾರ್ಡ್ ಅಥವಾ ಡಿ.ಎಲ್‌ ಅಥವಾ ಪ್ಯಾನ್ ಕಾರ್ಡ್‌ನಂತಹ ಗುರುತಿನ ಚೀಟಿ ಕಡ್ಡಾಯವಾಗಿರುತ್ತದೆ.

ಲಗೇಜ್ ಸೇವೆ ಬಳಸುವವರು ಪ್ರಯಾಣ ಟಿಕೆಟ್ ಕೂಡ ತೋರಿಸಬೇಕು. ವಿಶೇಷವಾಗಿ ಬೈಕ್ ವಿಮೆ ಅವಧಿ ಮುಗಿದಿರಬಾರದು. ಅವಧಿ ಮೀರಿದ ವಿಮೆಯಿಂದ ಬುಕ್ಕಿಂಗ್ ಸಮಯದಲ್ಲಿ ತೊಂದರೆ ಎದುರಾಗುವ ಸಾಧ್ಯತೆ ಇದೆ.

ಬುಕ್ಕಿಂಗ್ ಪ್ರಕ್ರಿಯೆ ಸರಳವಾಗಿದೆ. ಮೊದಲು ಸಮೀಪದ ರೈಲು ನಿಲ್ದಾಣದ ಪಾರ್ಸೆಲ್ ಕಚೇರಿಗೆ ತೆರಳಿ ಅರ್ಜಿ ಸಲ್ಲಿಸಬೇಕು. ಬಳಿಕ ರೈಲ್ವೆ ಅಧಿಕಾರಿಗಳು ವಾಹನದ ತೂಕ, ಮಾದರಿ, ಗಮ್ಯಸ್ಥಾನ ಹಾಗೂ ಇತರ ವಿವರಗಳನ್ನು ದಾಖಲಿಸುತ್ತಾರೆ. ನಿಗದಿತ ಶುಲ್ಕ ಪಾವತಿಸಿದ ನಂತರ ನಿಮಗೆ ಪಾರ್ಸೆಲ್ ರಶೀದಿ ನೀಡಲಾಗುತ್ತದೆ. ಈ ರಶೀದಿ ಅತ್ಯಂತ ಮುಖ್ಯವಾಗಿದ್ದು, ಗಮ್ಯಸ್ಥಾನದಲ್ಲಿ ವಾಹನ ಪಡೆಯಲು ಅದನ್ನು ತೋರಿಸಬೇಕು. ಹೀಗಾಗಿ ಅದನ್ನು ಜೋಪಾನವಾಗಿ ಇಟ್ಟುಕೊಳ್ಳಬೇಕು.

ವಾಹನವನ್ನು ಸುರಕ್ಷಿತವಾಗಿ ಸಾಗಿಸಲು ಪ್ಯಾಕಿಂಗ್ ಪ್ರಮುಖ ಹಂತವಾಗಿದೆ. ಸಾಗಣೆ ವೇಳೆ ಸ್ಕ್ರಾಚ್ ಅಥವಾ ಹಾನಿ ಆಗದಂತೆ ಬೈಕ್ ಅಥವಾ ಸ್ಕೂಟರ್ ಅನ್ನು ಸರಿಯಾಗಿ ಪ್ಯಾಕ್ ಮಾಡುವುದು ಅಗತ್ಯ. ಬಹುತೇಕ ರೈಲು ನಿಲ್ದಾಣಗಳಲ್ಲಿ ಪ್ಯಾಕಿಂಗ್ ಸೌಲಭ್ಯ ಲಭ್ಯವಿದ್ದು, ಸಾಮಾನ್ಯವಾಗಿ 300ರಿಂದ 600 ರೂ ಒಳಗೆ ವೆಚ್ಚವಾಗಬಹುದು.

ಇದಕ್ಕೂ ಮೊದಲು ಕೆಲವು ಮುನ್ನೆಚ್ಚರಿಕೆಗಳನ್ನು ಪಾಲಿಸಬೇಕು. ವಾಹನದ ಪೆಟ್ರೋಲ್ ಟ್ಯಾಂಕ್ ಬಹುತೇಕ ಖಾಲಿಯಾಗಿರಬೇಕು. ಸುರಕ್ಷತಾ ಕಾರಣಗಳಿಂದ ಪೂರ್ಣ ಟ್ಯಾಂಕ್‌ಗೆ ಅನುಮತಿ ಇರುವುದಿಲ್ಲ. ಸೈಡ್ ಮಿರರ್, ಲೂಸ್ ಆಕ್ಸೆಸರೀಸ್ ಅಥವಾ ಸುಲಭವಾಗಿ ಕಳಚಬಹುದಾದ ಭಾಗಗಳನ್ನು ತೆಗೆದು ಇಡುವುದು ಉತ್ತಮ.

ಶುಲ್ಕವು ವಾಹನದ ತೂಕ, ಸಾಗಿಸಬೇಕಾದ ದೂರ ಹಾಗೂ ರೈಲ್ವೆಯ ನಿಯಮಗಳ ಆಧಾರದ ಮೇಲೆ ಬದಲಾಗುತ್ತದೆ. ಖಾಸಗಿ ಸಾಗಣೆ ಸೇವೆಗಳಿಗಿಂತ ಇದು ಕಡಿಮೆ ವೆಚ್ಚದ ಆಯ್ಕೆಯಾಗಿರುವುದು ಅನೇಕರು ರೈಲ್ವೆ ಸೇವೆ ಆಯ್ಕೆಮಾಡುವ ಪ್ರಮುಖ ಕಾರಣವಾಗಿದೆ.

ಒಟ್ಟಿನಲ್ಲಿ, ದೂರದ ಪ್ರಯಾಣ ಅಥವಾ ಸ್ಥಳಾಂತರದ ಸಂದರ್ಭದಲ್ಲಿ ಬೈಕ್ ಅಥವಾ ಸ್ಕೂಟರ್ ಸಾಗಿಸಲು ಭಾರತೀಯ ರೈಲ್ವೆಯ ಪಾರ್ಸೆಲ್ ಸೇವೆ ವಿಶ್ವಾಸಾರ್ಹ, ಸುರಕ್ಷಿತ ಹಾಗೂ ಕೈಗೆಟುಕುವ ಮಾರ್ಗವಾಗಿದೆ. ಸರಿಯಾದ ದಾಖಲೆಗಳು, ನಿಯಮಗಳು ಮತ್ತು ಮುನ್ನೆಚ್ಚರಿಕೆಗಳ ಬಗ್ಗೆ ತಿಳಿದಿದ್ದರೆ ಯಾವುದೇ ಗೊಂದಲವಿಲ್ಲದೆ ನಿಮ್ಮ ವಾಹನವನ್ನು ಸುಲಭವಾಗಿ ಬೇಕಾದ ಸ್ಥಳಕ್ಕೆ ಕಳುಹಿಸಬಹುದು.