ನವದೆಹಲಿ: ದೇಶಾದ್ಯಂತ ಎಲ್ಪಿಜಿ (LPG) ಮತ್ತು ಪೈಪ್ಡ್ ನ್ಯಾಚುರಲ್ ಗ್ಯಾಸ್ (PNG) ಸಂಪರ್ಕ ಹೊಂದಿರುವ ಕುಟುಂಬಗಳಿಗೆ ಕೇಂದ್ರ ಸರ್ಕಾರ ಹೊಸ ನಿಯಮ ಜಾರಿಗೊಳಿಸಿದ್ದು, ಇನ್ನು ಮುಂದೆ ಒಂದು ಕುಟುಂಬವು ಎರಡೂ ಸಂಪರ್ಕಗಳನ್ನು ಒಂದೇ ವೇಳೆ ಹೊಂದಲು ಅವಕಾಶ ಇರುವುದಿಲ್ಲ.
ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯವು 2026ರ ಮಾರ್ಚ್ನಲ್ಲಿ ಹೊರಡಿಸಿರುವ ತಿದ್ದುಪಡಿ ಆದೇಶದ ಪ್ರಕಾರ, ಈಗಾಗಲೇ PNG ಸಂಪರ್ಕ ಹೊಂದಿರುವ ಗ್ರಾಹಕರು ತಮ್ಮ ಗೃಹಬಳಕೆಯ LPG ಸಂಪರ್ಕವನ್ನು ಹಿಂತಿರುಗಿಸಬೇಕಾಗಿದೆ. ಇದೇ ವೇಳೆ PNG ಹೊಂದಿರುವವರಿಗೆ ಹೊಸ LPG ಸಂಪರ್ಕ ಅಥವಾ ಸಿಲಿಂಡರ್ ರಿಫಿಲ್ ನೀಡುವುದನ್ನೂ ತೈಲ ಕಂಪನಿಗಳಿಗೆ ನಿರ್ಬಂಧಿಸಲಾಗಿದೆ.
ಈ ಕ್ರಮದ ಉದ್ದೇಶ ಗೃಹಬಳಕೆಯ ಸಿಲಿಂಡರ್ಗಳ ದುರುಪಯೋಗ, ಅಕ್ರಮ ಸಂಗ್ರಹಣೆ ಹಾಗೂ ಕಪ್ಪು ಮಾರುಕಟ್ಟೆ ಚಟುವಟಿಕೆಗಳನ್ನು ತಡೆಯುವುದಾಗಿದೆ ಎಂದು ತಿಳಿಸಲಾಗಿದೆ. ತೈಲ ಮಾರುಕಟ್ಟೆ ಕಂಪನಿಗಳು (OMCs) ಈಗಾಗಲೇ PNG ಮತ್ತು LPG ಎರಡೂ ಸಂಪರ್ಕಗಳನ್ನು ಹೊಂದಿರುವ ಗ್ರಾಹಕರ ಮಾಹಿತಿಯನ್ನು ಪರಿಶೀಲಿಸುವ ಪ್ರಕ್ರಿಯೆ ಆರಂಭಿಸಿವೆ.
ಹೊಸ ನಿಯಮದ ಪ್ರಕಾರ, PNG ಸಂಪರ್ಕ ಪಡೆದ ಬಳಿಕ ಗ್ರಾಹಕರು ನಿಗದಿತ ಅವಧಿಯೊಳಗೆ LPG ಸಂಪರ್ಕವನ್ನು ಸರೆಂಡರ್ ಮಾಡಬೇಕಾಗುತ್ತದೆ. ನಿಯಮ ಉಲ್ಲಂಘಿಸಿದರೆ LPG ಪೂರೈಕೆ ಸ್ಥಗಿತಗೊಳ್ಳುವ ಸಾಧ್ಯತೆಯಿದೆ ಎಂದು ವರದಿಗಳು ತಿಳಿಸಿವೆ.
ಆದರೆ, ನಂತರ PNG ಸೌಲಭ್ಯ ಇಲ್ಲದ ಪ್ರದೇಶಕ್ಕೆ ಸ್ಥಳಾಂತರವಾದಲ್ಲಿ ಮತ್ತೆ LPG ಸಂಪರ್ಕವನ್ನು ಮರುಸಕ್ರಿಯಗೊಳಿಸಿಕೊಳ್ಳುವ ಅವಕಾಶವನ್ನು ಕಲ್ಪಿಸಿದೆ.
ದೇಶದ ಹಲವು ಭಾಗಗಳಲ್ಲಿ ಇಂಡೇನ್, ಭಾರತ್ ಗ್ಯಾಸ್ ಹಾಗೂ HP ಗ್ಯಾಸ್ ಗ್ರಾಹಕರಿಗೆ ತಮ್ಮ ಸಂಪರ್ಕ ವಿವರಗಳನ್ನು ದೃಢೀಕರಿಸುವಂತೆ ಸಂದೇಶಗಳು ರವಾನೆಯಾಗುತ್ತಿವೆ. ಕೆಲವು ಪ್ರದೇಶಗಳಲ್ಲಿ ಈಗಾಗಲೇ ಸಾವಿರಾರು ಗ್ರಾಹಕರು LPG ಸಂಪರ್ಕಗಳನ್ನು ಹಿಂತಿರುಗಿಸಿರುವುದಾಗಿ ವರದಿಯಾಗಿದೆ.
ಇದರ ಜೊತೆಗೆ, ಅವಧಿ ಮೀರಿದ ಅಥವಾ ಸುರಕ್ಷತಾ ಪರಿಶೀಲನೆಗೆ ಒಳಪಡಿಸದ ಹಳೆಯ LPG ಸಿಲಿಂಡರ್ಗಳನ್ನು ಬಳಸಬಾರದು ಎಂದು ತೈಲ ಕಂಪನಿಗಳು ಸೂಚಿಸಿವೆ. ಬಳಕೆಗೆ ಅನರ್ಹವಾಗಿರುವ ಸಿಲಿಂಡರ್ಗಳನ್ನು ಗ್ಯಾಸ್ ಏಜೆನ್ಸಿಗೆ ಹಿಂತಿರುಗಿಸಿ ಹೊಸದನ್ನು ಪಡೆಯುವಂತೆ ಗ್ರಾಹಕರಿಗೆ ಸಲಹೆ ನೀಡಲಾಗಿದೆ.
