>>ಕೆನರಾ ನೆಕ್ಸ್ಟ್ ನ್ಯೂಸ್ ಡೆಸ್ಕ್
ನಮ್ಮ ಫೋನ್ ಕೈಯಲ್ಲಿಲ್ಲದಿದ್ದರೆ ಒಂದು ದಿನ ಕಳೆಯುವುದೂ ಕಷ್ಟ ಎನ್ನುವ ಕಾಲ ಇದು. ಬ್ಯಾಂಕ್ ವ್ಯವಹಾರದಿಂದ ಹಿಡಿದು ಫೋಟೋ, ಪಾಸ್ವರ್ಡ್, ವೈಯಕ್ತಿಕ ದಾಖಲೆಗಳವರೆಗೆ ಎಲ್ಲವೂ ಮೊಬೈಲ್ನಲ್ಲೇ ಇರುತ್ತವೆ.
ಹೀಗಿರುವಾಗ ಫೋನ್ನೊಳಗೆ ಯಾವುದೋ ಮಾಲ್ವೇರ್ ಸೇರಿಕೊಂಡಿದ್ದರೂ ಅದು ನಮಗೆ ಗೊತ್ತಾಗದೇ ಇದ್ದರೆ? ಇನ್ನೂ ವಿಚಿತ್ರವೆಂದರೆ, ಕೆಲವು ಮಾಲ್ವೇರ್ಗಳು ಯಾವುದೇ ದೊಡ್ಡ ಸೂಚನೆಯನ್ನೇ ನೀಡದೆ ಹಿನ್ನೆಲೆಯಲ್ಲಿ ಕೆಲಸ ಮಾಡುತ್ತಿರುತ್ತವೆ. ಆದರೆ ಫೋನ್ನ ವರ್ತನೆಯಲ್ಲಿ ಕೆಲವು ಬದಲಾವಣೆಗಳು ಕಂಡುಬಂದರೆ ಮಾತ್ರ ಅನುಮಾನ ಪಡಬಹುದು.
ಮೊದಲನೆಯದಾಗಿ ಪದೇಪದೇ ಪಾಪ್ಅಪ್ ಜಾಹೀರಾತುಗಳು ಕಾಣಿಸಿಕೊಳ್ಳುತ್ತಿವೆಯೇ? ನೀವು ಯಾವುದೇ ವೆಬ್ಸೈಟ್ ತೆರೆದಿಲ್ಲವಾದರೂ ಸ್ಕ್ರೀನ್ ಮೇಲೆ ವಿಚಿತ್ರ ಜಾಹೀರಾತುಗಳು ಬರುತ್ತಿದ್ದರೆ ಎಚ್ಚರ. ಕೆಲವು ಮಾಲ್ವೇರ್ಗಳು ಜಾಹೀರಾತುಗಳನ್ನು ತೋರಿಸಿ, ಬಳಕೆದಾರರು ಅವುಗಳನ್ನು ಕ್ಲಿಕ್ ಮಾಡುವಂತೆ ಮಾಡುತ್ತವೆ.
ಇನ್ನು ಬ್ಯಾಟರಿ ಮೊದಲಿಗಿಂತ ಬೇಗ ಖಾಲಿಯಾಗುತ್ತಿದೆಯೇ? ಮೊಬೈಲ್ ಹೆಚ್ಚು ಬಳಸದೇ ಇದ್ದರೂ ಚಾರ್ಜ್ ಬೇಗ ಇಳಿಯುತ್ತಿದ್ದರೆ ಒಮ್ಮೆ ಪರಿಶೀಲಿಸಿ. ಕೆಲವು ದುರುದ್ದೇಶದ ಆ್ಯಪ್ಗಳು ಬ್ಯಾಕ್ಗ್ರೌಂಡ್ನಲ್ಲಿ ಕಣ್ಣಿಗೆ ಕಾಣದಂತೆ ನಿರಂತರವಾಗಿ ಕೆಲಸ ಮಾಡುವುದರಿಂದ ಬ್ಯಾಟರಿ ಬಳಕೆ ಹೆಚ್ಚಾಗಬಹುದು.
ಫೋನ್ ಇದ್ದಕ್ಕಿದ್ದಂತೆ ನಿಧಾನವಾಗಿದೆಯೇ? ಮೊದಲು ಕ್ಷಣಾರ್ಧದಲ್ಲಿ ತೆರೆಯುತ್ತಿದ್ದ ಆ್ಯಪ್ಗಳು ಈಗ ತೆರೆದುಕೊಳ್ಳಲು ಸಮಯ ತೆಗೆದುಕೊಳ್ಳುತ್ತಿವೆಯೇ? ಪದೇಪದೇ ಆ್ಯಪ್ಗಳು ಕ್ರ್ಯಾಶ್ ಆಗುತ್ತಿವೆಯೇ? ಇಂತಹ ಬದಲಾವಣೆಗಳಿಗೂ ಹಲವು ಕಾರಣಗಳಿರಬಹುದು. ಸ್ಟೋರೇಜ್ ತುಂಬಿರುವುದು ಅಥವಾ ಹಳೆಯ ಫೋನ್ ಆಗಿರುವುದೂ ಕಾರಣವಾಗಿರಬಹುದು. ಆದರೆ ಇತರ ಲಕ್ಷಣಗಳ ಜತೆ ಇದು ಕೂಡ ಕಂಡುಬಂದರೆ ಗಮನ ಕೊಡುವುದು ಒಳ್ಳೆಯದು.
ಇನ್ನು ಯಾವುದೇ ಕೆಲಸ ಮಾಡದಿದ್ದರೂ ಫೋನ್ ಬಿಸಿಯಾಗುತ್ತಿದೆಯೇ? ಗೇಮ್ ಆಡುತ್ತಿಲ್ಲ, ವಿಡಿಯೋ ನೋಡುತ್ತಿಲ್ಲ, ಚಾರ್ಜ್ ಕೂಡ ಹಾಕಿಲ್ಲ… ಆದರೂ ಮೊಬೈಲ್ ಅಸಹಜವಾಗಿ ಬಿಸಿಯಾಗುತ್ತಿದ್ದರೆ ಹಿನ್ನೆಲೆಯಲ್ಲಿ ಯಾವುದೋ ಪ್ರಕ್ರಿಯೆ ಹೆಚ್ಚು ಕೆಲಸ ಮಾಡುತ್ತಿದೆಯೇ ಎಂದು ಪರಿಶೀಲಿಸಿ.
ಹಾಗಾದರೆ ಇಂತಹ ಅನುಮಾನ ಬಂದರೆ ಏನು ಮಾಡಬೇಕು? ಮೊದಲು ಇತ್ತೀಚೆಗೆ ಇನ್ಸ್ಟಾಲ್ ಮಾಡಿದ ಆ್ಯಪ್ಗಳನ್ನು ಒಮ್ಮೆ ನೋಡಿ. ಪರಿಚಯವಿಲ್ಲದ ಅಥವಾ ಅನುಮಾನಾಸ್ಪದ ಆ್ಯಪ್ ಇದ್ದರೆ ತೆಗೆದುಹಾಕಿ. Android ಫೋನ್ನಲ್ಲಿ Safe Mode ಬಳಸಿಕೊಂಡು ಮೂರನೇ ವ್ಯಕ್ತಿಯ ಆ್ಯಪ್ಗಳಿಂದ ಸಮಸ್ಯೆ ಉಂಟಾಗುತ್ತಿದೆಯೇ ಎಂಬುದನ್ನೂ ಪರೀಕ್ಷಿಸಬಹುದು. ವಿಶ್ವಾಸಾರ್ಹ ಮೊಬೈಲ್ ಸೆಕ್ಯುರಿಟಿ ಆ್ಯಪ್ ಮೂಲಕ ಸ್ಕ್ಯಾನ್ ಮಾಡುವುದು ಮತ್ತೊಂದು ಮಾರ್ಗ.
ಯಾವುದೂ ಪ್ರಯೋಜನವಾಗದಿದ್ದರೆ Factory Reset ಕೊನೆಯ ಆಯ್ಕೆಯಾಗಬಹುದು. ಆದರೆ ಅದಕ್ಕೂ ಮೊದಲು ನಿಮ್ಮ ಫೋಟೋ, ಸಂಪರ್ಕಗಳು, ದಾಖಲೆಗಳು ಸೇರಿದಂತೆ ಮುಖ್ಯ ಮಾಹಿತಿಯ ಬ್ಯಾಕಪ್ ತೆಗೆದುಕೊಳ್ಳುವುದನ್ನು ಮರೆಯಬೇಡಿ.
ಆದರೆ ಒಂದು ವಿಷಯ ನೆನಪಿರಲಿ, ಬ್ಯಾಟರಿ ಬೇಗ ಖಾಲಿಯಾಗುವುದು ಅಥವಾ ಫೋನ್ ಬಿಸಿಯಾಗುವುದು ಮಾತ್ರವೇ ವೈರಸ್ ಇರುವುದಕ್ಕೆ ಖಚಿತ ಸಾಕ್ಷಿಯಲ್ಲ. ಇಂತಹ ಸಮಸ್ಯೆಗಳಿಗೆ ಹಲವು ಸಾಮಾನ್ಯ ಕಾರಣಗಳೂ ಇರಬಹುದು. ಆದರೆ ಒಂದೇ ಸಮಯದಲ್ಲಿ ಪಾಪ್ಅಪ್ ಜಾಹೀರಾತುಗಳು, ಅಸಹಜ ಬ್ಯಾಟರಿ ಬಳಕೆ, ನಿಧಾನಗತಿ ಮತ್ತು ಕಾರಣವಿಲ್ಲದ ಬಿಸಿಯಾಗುವಿಕೆ ಕಾಣಿಸಿಕೊಂಡರೆ, ‘ಏನೋ ಸರಿಯಿಲ್ಲ’ ಎಂದು ಒಮ್ಮೆ ಪರಿಶೀಲಿಸುವುದು ಒಳಿತು.
ಫೋನ್ ನಮ್ಮನ್ನು ಎಚ್ಚರಿಸಲು ಬಂದು ‘ನನ್ನೊಳಗೆ ವೈರಸ್ ಇದೆ’ ಎಂದು ಹೇಳುವುದಿಲ್ಲ. ಅದರ ವರ್ತನೆಯಲ್ಲಾಗುವ ಸಣ್ಣ ಬದಲಾವಣೆಗಳೇ ಕೆಲವೊಮ್ಮೆ ಆ ಎಚ್ಚರಿಕೆಯ ಸಂದೇಶವಾಗಿರುತ್ತವೆ!
