ಮಳೆಗಾಲ ಬಂತೆಂದರೆ ಪ್ರಕೃತಿ ಹೊಸ ಚೈತನ್ಯದಿಂದ ಕಂಗೊಳಿಸುತ್ತದೆ. ಹಸಿರು ಹೊದಿಕೆಯ ಬೆಟ್ಟಗಳು, ತುಂತುರು ಮಳೆ, ತಂಪಾದ ಗಾಳಿ ಮನಸ್ಸಿಗೆ ಮುದ ನೀಡುತ್ತವೆ. ಆದರೆ ಇದೇ ಕಾಲ ಚಿಕ್ಕ ಮಕ್ಕಳಿರುವ ಮನೆಗಳಲ್ಲಿ ಸ್ವಲ್ಪ ಕಳವಳವನ್ನೂ ಹುಟ್ಟಿಸುತ್ತದೆ.
ಹವಾಮಾನದಲ್ಲಾಗುವ ಬದಲಾವಣೆ, ತೇವಾಂಶ ಹೆಚ್ಚಳ ಮತ್ತು ಸೋಂಕುಕಾರಕ ವೈರಸ್ಗಳ ಹರಡುವಿಕೆಯಿಂದ ಮಕ್ಕಳಲ್ಲಿ ನೆಗಡಿ, ಕೆಮ್ಮು, ಕಫ, ಗಂಟಲು ನೋವು, ಹೊಟ್ಟೆನೋವು, ಅಜೀರ್ಣ ಹಾಗೂ ಸಣ್ಣಪುಟ್ಟ ಜ್ವರದ ಸಮಸ್ಯೆಗಳು ಸಾಮಾನ್ಯವಾಗಿ ಕಾಣಿಸಿಕೊಳ್ಳುತ್ತವೆ.
ಪ್ರತಿಯೊಂದು ಸಮಸ್ಯೆಗೂ ತಕ್ಷಣ ಆಸ್ಪತ್ರೆಗೆ ಓಡುವ ಅಗತ್ಯವಿಲ್ಲದಿದ್ದರೂ, ಸೂಕ್ತ ಮುನ್ನೆಚ್ಚರಿಕೆ ಮತ್ತು ಮನೆಯಲ್ಲೇ ಲಭ್ಯವಿರುವ ಕೆಲವು ಗಿಡಮೂಲಿಕೆಗಳ ಜ್ಞಾನ ಇದ್ದರೆ ಸಾಕಷ್ಟು ಸಂದರ್ಭಗಳಲ್ಲಿ ಆರಂಭಿಕ ಹಂತದಲ್ಲೇ ಪರಿಹಾರ ಕಂಡುಕೊಳ್ಳಬಹುದು. ನಮ್ಮ ಅಜ್ಜ-ಅಜ್ಜಿಯರ ಕಾಲದಲ್ಲಿ ಮನೆಯಂಗಳದ ತುಳಸಿ ಕಟ್ಟೆ, ದೊಡ್ಡಪತ್ರೆ ಗಿಡ, ಕರಿಬೇವಿನ ಮರ ಹಾಗೂ ಅಡುಗೆಮನೆಯ ಶುಂಠಿ-ಅರಿಶಿನವೇ ಮನೆಯ ಪುಟ್ಟ ಔಷಧಾಲಯಗಳಾಗಿದ್ದವು.
ಮಕ್ಕಳ ಆರೋಗ್ಯದ ವಿಚಾರ ಬಂದಾಗ ಮೊದಲಿಗೆ ನೆನಪಾಗುವ ಗಿಡ ತುಳಸಿ. ತುಳಸಿಯ ಎಲೆಗಳಲ್ಲಿ ರೋಗನಿರೋಧಕ ಶಕ್ತಿ ಹೆಚ್ಚಿಸುವ ಗುಣಗಳಿದ್ದು, ನೆಗಡಿ, ಕೆಮ್ಮು ಹಾಗೂ ಕಫದ ಸಮಸ್ಯೆಗಳಿಗೆ ಇದು ಅತ್ಯುತ್ತಮ ಮನೆಮದ್ದಾಗಿದೆ. ತುಳಸಿ ಎಲೆಗಳನ್ನು ನೀರಿನಲ್ಲಿ ಕುದಿಸಿ, ತಣ್ಣಗಾದ ಬಳಿಕ ದೊಡ್ಡ ಮಕ್ಕಳಿಗೆ ಕೊಟ್ಟರೆ ಶೀತದ ತೊಂದರೆ ಕಡಿಮೆಯಾಗಲು ನೆರವಾಗುತ್ತದೆ.
ಅದೇ ರೀತಿ ದೊಡ್ಡಪತ್ರೆ ಎಲೆಯೂ ಮಕ್ಕಳಿಗೆ ಅತ್ಯಂತ ಉಪಯುಕ್ತ. ಅದರ ಎಲೆಗಳನ್ನು ಸ್ವಲ್ಪ ಬಿಸಿ ಮಾಡಿ ರಸ ತೆಗೆದು ನೀಡುವುದು ಅಥವಾ ಎಲೆಯ ಹಬೆಯನ್ನು ಉಸಿರಾಡುವಂತೆ ಮಾಡುವುದು ಮೂಗು ಕಟ್ಟಿಕೊಳ್ಳುವುದು ಹಾಗೂ ಎದೆಕಫದ ಸಮಸ್ಯೆಗೆ ಪರಿಹಾರ ನೀಡುತ್ತದೆ.
ಅಡುಗೆಮನೆಯಲ್ಲಿ ಸುಲಭವಾಗಿ ಸಿಗುವ ಶುಂಠಿಯೂ ಮಳೆಗಾಲದಲ್ಲಿ ಮಕ್ಕಳ ಆರೋಗ್ಯದ ಗೆಳೆಯ. ಶುಂಠಿ ಜೀರ್ಣಕ್ರಿಯೆ ಸುಧಾರಿಸುವುದರ ಜೊತೆಗೆ ಗಂಟಲು ನೋವು ಮತ್ತು ಕೆಮ್ಮನ್ನು ಕಡಿಮೆ ಮಾಡಲು ಸಹಕಾರಿ. ಹೊಟ್ಟೆ ಉಬ್ಬರ, ಅಜೀರ್ಣ ಅಥವಾ ವಾಂತಿಯ ಭಾವನೆ ಇದ್ದಾಗಲೂ ಶುಂಠಿ ಉತ್ತಮ ಪರಿಣಾಮ ನೀಡುತ್ತದೆ.
ಅರಿಶಿನವೂ ಅಷ್ಟೇ ಮಹತ್ವದ್ದು. ಸೋಂಕು ನಿವಾರಕ ಗುಣಗಳನ್ನು ಹೊಂದಿರುವ ಅರಿಶಿನವನ್ನು ಬಿಸಿ ಹಾಲಿನಲ್ಲಿ ಬೆರೆಸಿ ಕೊಡುವುದು ಅಥವಾ ಆಹಾರದಲ್ಲಿ ಬಳಸುವುದು ದೇಹದ ರೋಗನಿರೋಧಕ ಶಕ್ತಿ ಹೆಚ್ಚಿಸಲು ನೆರವಾಗುತ್ತದೆ.
ಪುದೀನಾ ಮತ್ತೊಂದು ಅದ್ಭುತ ಔಷಧೀಯ ಸಸ್ಯ. ಹೊಟ್ಟೆನೋವು, ಅಜೀರ್ಣ ಹಾಗೂ ವಾಕರಿಕೆ ಸಮಸ್ಯೆಗಳಿಗೆ ಇದು ಉಪಯುಕ್ತ. ಪುದೀನಾ ಎಲೆಗಳನ್ನು ನೀರಿನಲ್ಲಿ ಕುದಿಸಿ ಅದರ ಸುವಾಸನೆಯನ್ನು ಉಸಿರಾಡುವುದರಿಂದ ಮೂಗು ಕಟ್ಟಿಕೊಳ್ಳುವ ಸಮಸ್ಯೆಯೂ ಕಡಿಮೆಯಾಗಬಹುದು.
ಕರಿಬೇವು ಕೇವಲ ಅಡುಗೆಯ ರುಚಿ ಹೆಚ್ಚಿಸುವುದಷ್ಟೇ ಅಲ್ಲ, ಜೀರ್ಣಕ್ರಿಯೆ ಸುಧಾರಿಸಿ ಮಕ್ಕಳಿಗೆ ಅಗತ್ಯವಾದ ಪೋಷಕಾಂಶಗಳನ್ನು ಒದಗಿಸುತ್ತದೆ. ಬೆಳ್ಳುಳ್ಳಿ ಸಹ ರೋಗನಿರೋಧಕ ಶಕ್ತಿ ಹೆಚ್ಚಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಶೀತ ಮತ್ತು ಕಫದ ತೊಂದರೆಗಳನ್ನು ನಿಯಂತ್ರಿಸಲು ಇದು ಸಹಕಾರಿ.
ಇದರ ಜೊತೆಗೆ ಅಲೋವೆರಾ, ಲೆಮನ್ಗ್ರಾಸ್ ಮುಂತಾದ ಗಿಡಗಳನ್ನು ಮನೆಯಲ್ಲಿಟ್ಟುಕೊಳ್ಳುವುದೂ ಉಪಯುಕ್ತ. ಅಲೋವೆರಾ ಚರ್ಮದ ಸಣ್ಣಪುಟ್ಟ ಸಮಸ್ಯೆಗಳಿಗೆ ನೆರವಾದರೆ, ಲೆಮನ್ಗ್ರಾಸ್ನಿಂದ ತಯಾರಿಸುವ ಕಷಾಯ ಶೀತದ ಸಮಯದಲ್ಲಿ ಆರಾಮ ನೀಡುತ್ತದೆ. ಇಂತಹ ಗಿಡಮೂಲಿಕೆಗಳು ಮನೆ ಸುತ್ತಮುತ್ತ ಇದ್ದರೆ ತುರ್ತು ಸಂದರ್ಭಗಳಲ್ಲಿ ಸಹಾಯಕ್ಕೆ ಬರುತ್ತವೆ.
ಆದರೆ ಮನೆಮದ್ದುಗಳನ್ನು ಬಳಸುವಾಗ ಎಚ್ಚರಿಕೆ ಅಗತ್ಯ. ಒಂದು ವರ್ಷದೊಳಗಿನ ಶಿಶುಗಳಿಗೆ ಜೇನುತುಪ್ಪ ನೀಡಬಾರದು. ಎರಡು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ಯಾವುದೇ ಮನೆಮದ್ದನ್ನು ವೈದ್ಯರ ಸಲಹೆಯಿಲ್ಲದೆ ನೀಡುವುದು ಸೂಕ್ತವಲ್ಲ. ಉಸಿರಾಟದ ತೊಂದರೆ, ತೀವ್ರ ಜ್ವರ, ನಿರಂತರ ವಾಂತಿ, ಅತಿಸಾರ ಅಥವಾ ಮಗುವಿನ ಆರೋಗ್ಯ ವೇಗವಾಗಿ ಹದಗೆಡುತ್ತಿರುವ ಲಕ್ಷಣಗಳು ಕಂಡುಬಂದರೆ ತಕ್ಷಣ ವೈದ್ಯಕೀಯ ಚಿಕಿತ್ಸೆ ಪಡೆಯಬೇಕು. ಮನೆಮದ್ದುಗಳು ವೈದ್ಯಕೀಯ ಚಿಕಿತ್ಸೆಗೆ ಪರ್ಯಾಯವಲ್ಲ, ಅವು ಕೇವಲ ಪ್ರಾಥಮಿಕ ನೆರವು ಮಾತ್ರ.
ಇಂದು ನಗರೀಕರಣದ ಅಬ್ಬರದಲ್ಲಿ ನಮ್ಮ ಮನೆಯಂಗಳಗಳಿಂದ ಔಷಧೀಯ ಗಿಡಗಳು ಕಣ್ಮರೆಯಾಗುತ್ತಿವೆ. ಆದರೆ ಮಳೆಗಾಲದಂತಹ ಸಮಯದಲ್ಲಿ ಅವುಗಳ ಮಹತ್ವ ಮತ್ತೊಮ್ಮೆ ಅರಿವಾಗುತ್ತದೆ. ಒಂದು ತುಳಸಿ ಗಿಡ, ಒಂದು ಓಮವಳ್ಳಿ, ಸ್ವಲ್ಪ ಪುದೀನಾ, ಕರಿಬೇವು ಹಾಗೂ ಅಡುಗೆಮನೆಯಲ್ಲಿ ಇರುವ ಶುಂಠಿ-ಅರಿಶಿನವೇ ಮಕ್ಕಳ ಆರೋಗ್ಯಕ್ಕೆ ಮೊದಲ ಹಂತದ ಕಾವಲುಗಾರರಾಗಬಹುದು. ಪ್ರಕೃತಿ ನಮಗೆ ನೀಡಿರುವ ಈ ಅಮೂಲ್ಯ ಸಂಪತ್ತು ಪ್ರತೀ ಮನೆಯ ಅಂಗಳದಲ್ಲಿರಲಿ.
