ಶಿರಸಿ: ಕಾಲುದಾರಿಯಲ್ಲಿ ನಡೆದುಕೊಂಡು ಮನೆಗೆ ತೆರಳುತ್ತಿದ್ದ 86 ವರ್ಷದ ವೃದ್ಧರೊಬ್ಬರು ಕಡಿಜೇನುಗಳ ದಾಳಿಗೆ ಸಿಲುಕಿ ಮೃತಪಟ್ಟ ದಾರುಣ ಘಟನೆ ಶಿರಸಿ ತಾಲೂಕಿನ ಹೊಸಳ್ಳಿ ಸಮೀಪ ಅ. 28ರಂದು ನಡೆದಿದೆ.
ವಾನಳ್ಳಿ ಅಂಚೆಯ ಹಾವಿನಗದ್ದೆ ನಿವಾಸಿ ಗಣಪತಿ ತಿಮ್ಮಾ ಗೌಡ (86) ಮೃತಪಟ್ಟವರು. ಅವರು ಅ. 28ರಂದು ಬೆಳಿಗ್ಗೆ 11.30ರಿಂದ ಮಧ್ಯಾಹ್ನ 3.45ರ ನಡುವಿನ ಅವಧಿಯಲ್ಲಿ ಹೊಸಳ್ಳಿಯ ಕಾಯಶೆಟ್ಟಿ ಮನೆಯ ಸಮೀಪ ರಾಮಕೃಷ್ಣ ಹೆಗಡೆ ಅವರ ಮನೆಯಿಂದ ತಮ್ಮ ಮನೆಗೆ ಕಾಲುದಾರಿಯಲ್ಲಿ ನಡೆದುಕೊಂಡು ಹೋಗುತ್ತಿದ್ದರು.
ಈ ವೇಳೆ ಸುಮಾರು 50ರಿಂದ 60 ಕಡಿಜೇನುಗಳು ದಾಳಿ ನಡೆಸಿ ಕಚ್ಚಿದ್ದು, ಗಣಪತಿ ಗೌಡ ಅವರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ ಎಂದು ಅವರ ಪತ್ನಿ ದೇವಿ ಅವರು ಪೊಲೀಸರಿಗೆ ನೀಡಿದ ದೂರಿನಲ್ಲಿ ತಿಳಿಸಿದ್ದಾರೆ.
ತಮ್ಮ ಪತಿಯ ಸಾವಿನಲ್ಲಿ ಯಾವುದೇ ಸಂಶಯವಿಲ್ಲ ಎಂದು ದೇವಿ ಅವರು ದೂರಿನಲ್ಲಿ ಸ್ಪಷ್ಟಪಡಿಸಿದ್ದಾರೆ. ಈ ಕುರಿತು ಶಿರಸಿ ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ.
