ಶಿರಸಿ/ಯಲ್ಲಾಪುರ: ಶಿರಸಿಯ ನರೇಬೈಲ್‌ನ ಚಂದನ ಆಂಗ್ಲ ಮಾಧ್ಯಮ ಶಾಲೆಯ ಮುಖ್ಯಾಧ್ಯಾಪಕ ರವೀಂದ್ರ ಭಟ್ ಅಣಲಗಾರ ಅವರು ‘ಶಿಕ್ಷಣಸಿರಿ ರಾಜ್ಯೋತ್ಸವ ಪ್ರಶಸ್ತಿ’ಗೆ ಆಯ್ಕೆಯಾಗಿದ್ದಾರೆ.
ಚೇತನ ಫೌಂಡೇಶನ್, ಧಾರವಾಡ, ಶ್ರೀಗಂಧ ಕನ್ನಡ ಸಂಘ ಬೆಂಗಳೂರು ಹಾಗೂ ಆರ್ಯಭಟ ಎಜುಕೇಶನ್ ಅಕಾಡೆಮಿ ಧಾರವಾಡ ಇವುಗಳ ಸಂಯುಕ್ತ ಆಶ್ರಯದಲ್ಲಿ ಕನ್ನಡ ರಾಜ್ಯೋತ್ಸವದ ಅಂಗವಾಗಿ ಈ ಪ್ರಶಸ್ತಿ ನೀಡಲಾಗುತ್ತಿದೆ.
ನವೆಂಬರ್ 1ರಂದು ಧಾರವಾಡದ ಕೆ.ಸಿ. ರಸ್ತೆಯಲ್ಲಿರುವ ಮುಖ್ಯಪ್ರಾಣ ಸಭಾಂಗಣದಲ್ಲಿ ನಡೆಯುವ ಕರ್ನಾಟಕ ರಾಜ್ಯೋತ್ಸವ ಸಮಾರಂಭದಲ್ಲಿ ರವೀಂದ್ರ ಭಟ್ ಅವರಿಗೆ ಪ್ರಶಸ್ತಿ ಪ್ರದಾನ ಮಾಡಲಾಗುವುದು.
ಯಲ್ಲಾಪುರ ತಾಲೂಕಿನ ಅಣಲಗಾರಿನವರಾದ ರವೀಂದ್ರ ಭಟ್ ಅವರು ಶಿಕ್ಷಣ ಕ್ಷೇತ್ರದ ಜೊತೆಗೆ ಸಾಂಸ್ಕೃತಿಕ ಚಟುವಟಿಕೆಗಳಲ್ಲಿಯೂ ತೊಡಗಿಸಿಕೊಂಡಿದ್ದಾರೆ. ಹವ್ಯಾಸಿ ತಾಳಮದ್ದಳೆ ಅರ್ಥದಾರಿ, ನಾಟಕ ಕಲಾವಿದ ಹಾಗೂ ಕವಿಯಾಗಿಯೂ ಗುರುತಿಸಿಕೊಂಡಿದ್ದಾರೆ.
