ʻನಿನ್ನೆಯ ದಿನ ತುಂಬಾ ಕೆಟ್ಟದಾಗಿತ್ತು. ಬೆಳಗ್ಗೆಯಿಂದ ಒಂದಲ್ಲ ಒಂದು ಸಮಸ್ಯೆ. ಇವತ್ತೂ ಹೀಗೇ ಆಗಿಬಿಟ್ಟರೆ?ʼ ಎಂದು ಬೆಳಗ್ಗೆ ಎದ್ದ ತಕ್ಷಣವೇ ಯೋಚಿಸುವವರು ನಮ್ಮಲ್ಲಿ ಬಹಳ ಜನ ಇದ್ದಾರೆ. ನಿನ್ನೆ ನಡೆದ ಘಟನೆ, ಯಾರೋ ಆಡಿದ ಮಾತು, ಕೆಲಸದಲ್ಲಿ ಆದ ತೊಂದರೆ, ಕೈತಪ್ಪಿದ ಒಂದು ಅವಕಾಶ ಇವೆಲ್ಲವನ್ನೂ ಮನಸ್ಸಿನಲ್ಲಿಟ್ಟುಕೊಂಡೇ ಹೊಸ ದಿನವನ್ನು ಆರಂಭಿಸುತ್ತೇವೆ.
ಆದರೆ ಒಂದು ಕ್ಷಣ ಯೋಚಿಸಿ ನೋಡಿ. ನಿನ್ನೆ ಕೆಟ್ಟದಾಗಿತ್ತು ಎಂದು ಇಂದೂ ಕೆಟ್ಟದಾಗಿರಬೇಕೆ? ಖಂಡಿತ ಇಲ್ಲ. ನಿನ್ನೆ ಮುಗಿದುಹೋಗಿದೆ. ಅದು ಈಗ ನಮ್ಮ ಕೈಯಲ್ಲಿಲ್ಲ. ಆದರೆ ಇಂದು ನಮ್ಮ ಮುಂದೆ ಇದೆ. ಅದನ್ನು ಹೇಗೆ ಕಳೆಯಬೇಕು ಎನ್ನುವುದು ಮಾತ್ರ ನಮ್ಮ ಕೈಯಲ್ಲಿದೆ.
ನಿನ್ನೆ ನಾವು ಮಾಡಿದ ಸರಿ-ತಪ್ಪುಗಳನ್ನು ಬದಲಾಯಿಸಲು ಅಥವಾ ಅಳಿಸಲು ಆಗುವುದಿಲ್ಲ. ಯಾರಿಗಾದರೂ ನೋವು ಕೊಟ್ಟಿದ್ದರೆ, “ಆ ಮಾತನ್ನು ನಾನು ಹೇಳಲೇ ಇಲ್ಲ” ಎಂದು ಹೇಳಲಾಗುವುದಿಲ್ಲ. ಯಾವುದೋ ಕೆಲಸದಲ್ಲಿ ಸೋತಿದ್ದರೆ, ಆ ಸೋಲನ್ನು ಹಿಂದಕ್ಕೆ ತೆಗೆದುಕೊಂಡು ಗೆಲುವಾಗಿ ಬದಲಿಸಲು ಆಗುವುದಿಲ್ಲ. ಆದರೆ ಆ ತಪ್ಪಿನಿಂದ ಪಾಠ ಕಲಿಯಬಹುದು. ಸೋಲಿಗೆ ಕಾರಣವೇನು ಎಂದು ತಿಳಿದುಕೊಳ್ಳಬಹುದು. ಯಾರನ್ನಾದರೂ ನೋಯಿಸಿದ್ದರೆ, ಮುಂದೆ ಹಾಗೆ ಮಾಡದಂತೆ ಎಚ್ಚರ ವಹಿಸಬಹುದು. ಅಂದರೆ ನಿನ್ನೆ ನಮಗೆ ಪಾಠವಾಗಬೇಕು, ಶಿಕ್ಷೆಯಾಗಬಾರದು.
ಆದರೆ ಬಹಳ ಬಾರಿ ನಾವು ನಮ್ಮನ್ನೇ ಶಿಕ್ಷಿಸಿಕೊಳ್ಳುತ್ತೇವೆ. ಹೀಗೆ ಯೋಚಿಸುತ್ತಾ ಕುಳಿತರೆ ನಡೆದದ್ದು ಬದಲಾಗುವುದಿಲ್ಲ. ಬದಲಾಗಿ ಇಂದು ಇರುವ ಅವಕಾಶವೂ ಕೈತಪ್ಪುತ್ತದೆ. ತಪ್ಪಾಗಿದ್ದರೆ ಅದನ್ನು ಒಪ್ಪಿಕೊಳ್ಳಬೇಕು. ಸಾಧ್ಯವಾದರೆ ಸರಿಪಡಿಸುವ ದಾರಿಯನ್ನು ಹುಡುಕಬೇಕು. ಅದರಿಂದ ಪಾಠ ಕಲಿಯಬೇಕು. ನಂತರ ಮುಂದೆ ನಡೆಯಬೇಕು. ಹಿಂದಿನ ವಿಚಾರವನ್ನು ಪ್ರತಿದಿನವೂ ಹೊತ್ತುಕೊಂಡು ಹೋಗುವ ಅಗತ್ಯವಿಲ್ಲ.
ಆದರೆ ನಿನ್ನೆಗಿಂತ ಇಂದು ಚೆನ್ನಾಗಿರಬೇಕು ಎಂದರೆ, ನಿನ್ನೆಗಿಂತ ಇಂದು ನಮ್ಮ ಜೀವನದಲ್ಲಿ ಏನಾದರೂ ಒಳ್ಳೆಯ ಬದಲಾವಣೆ ಬರಬೇಕು. ಅದು ದೊಡ್ಡ ಬದಲಾವಣೆಯಾಗಬೇಕಿಲ್ಲ. ನಿನ್ನೆ ಮಾಡಲಾಗದ ಒಂದು ಕೆಲಸವನ್ನು ಇಂದು ಮಾಡಬಹುದು. ನಿನ್ನೆ ಮುಂದೂಡಿದ ಕೆಲಸವನ್ನು ಇಂದು ಮುಗಿಸಬಹುದು. ನಿನ್ನೆ ಯಾರ ಮಾತನ್ನೂ ಸರಿಯಾಗಿ ಕೇಳದೆ ಇದ್ದರೆ, ಇಂದು ಅವರ ಮಾತನ್ನು ಸ್ವಲ್ಪ ಗಮನದಿಂದ ಕೇಳಬಹುದು. ನಿನ್ನೆ ಕೋಪದಲ್ಲಿ ಮಾತನಾಡಿದ್ದರೆ, ಇಂದು ಅದೇ ಪರಿಸ್ಥಿತಿಯಲ್ಲಿ ಸ್ವಲ್ಪ ತಾಳ್ಮೆಯಿಂದ ಮಾತನಾಡಬಹುದು. ನಿನ್ನೆ ಸಮಯವನ್ನು ವ್ಯರ್ಥ ಮಾಡಿದ್ದರೆ, ಇಂದು ಅದೇ ತಪ್ಪು ಮತ್ತೆ ಆಗದಂತೆ ನೋಡಿಕೊಳ್ಳಬಹುದು. ಇಂತಹ ಸಣ್ಣ ಬದಲಾವಣೆಗಳೇ ನಿಜವಾದ ಬೆಳವಣಿಗೆ.
“ಪ್ರತಿದಿನವೂ ಇಷ್ಟು ದೊಡ್ಡ ಬದಲಾವಣೆ ಮಾಡುವುದು ಸಾಧ್ಯವೇ?” ಎಂದು ಕೇಳಬಹುದು. ಅದಕ್ಕೆ ಉತ್ತರ ಸರಳ. ಪ್ರತಿದಿನವೂ ದೊಡ್ಡ ಬದಲಾವಣೆ ಬೇಕಿಲ್ಲ. ಸಣ್ಣ ಬದಲಾವಣೆ ಸಾಕು. ನಿನ್ನೆ ಹತ್ತು ನಿಮಿಷವೂ ಪುಸ್ತಕ ಓದಿರಲಿಲ್ಲ ಎಂದಿಟ್ಟುಕೊಳ್ಳಿ. ಇಂದು ಹತ್ತು ನಿಮಿಷ ಓದಿ. ನಿನ್ನೆ ಯಾವುದೋ ಕೆಲಸವನ್ನು ಮುಂದಕ್ಕೆ ಹಾಕಿದ್ದರೆ, ಇಂದು ಅದನ್ನು ಮುಗಿಸಿ. ನಿನ್ನೆ ಯಾರಿಗಾದರೂ ಫೋನ್ ಮಾಡಬೇಕು ಎಂದುಕೊಂಡು ಮಾಡಿರಲಿಲ್ಲ ಎಂದರೆ, ಇಂದು ಮಾತನಾಡಿ. ಇಂದು ಮಾಡಿದ ಒಳ್ಳೆಯ ಅಭ್ಯಾಸವನ್ನು ನಾಳೆಯೂ ಮುಂದುವರಿಸಿ. ಹೀಗೆ ಸಣ್ಣ ಸಣ್ಣ ಬದಲಾವಣೆಗಳು ಸೇರಿ ಮುಂದೆ ದೊಡ್ಡ ಬದಲಾವಣೆಯಾಗುತ್ತವೆ.
ಇನ್ನೊಂದು ಮುಖ್ಯವಾದ ವಿಷಯ ನಮ್ಮನ್ನು ನಾವು ಬೇರೆಯವರೊಂದಿಗೆ ಹೋಲಿಸಿಕೊಳ್ಳುವುದು. “ಅವನು ನನ್ನ ವಯಸ್ಸಿನವನು, ಆದರೆ ಎಷ್ಟೆಲ್ಲಾ ಗಳಿಸಿದ್ದಾನೆ”, “ಅವಳ ಬಳಿ ಎಲ್ಲವೂ ಇದೆ, ನನಗೆ ಮಾತ್ರ ಇಂತಹ ಜೀವನ” ಎಂದು ಯೋಚಿಸುತ್ತಾ ಹೋದರೆ ನಮ್ಮಲ್ಲಿರುವ ನೆಮ್ಮದಿಯೂ ಹೋಗುತ್ತದೆ. ಪ್ರತಿಯೊಬ್ಬರ ಜೀವನಕ್ಕೂ ತನ್ನದೇ ಆದ ಸಮಯವಿದೆ. ಬೇರೆಯವರ ದಾರಿಯನ್ನು ನೋಡಿ ನಮ್ಮ ದಾರಿಯನ್ನು ಅಳೆಯಬಾರದು.
ನಿನ್ನೆ ಇದ್ದ ನಮ್ಮನ್ನೇ ಇಂದಿನ ನಮ್ಮೊಂದಿಗೆ ಹೋಲಿಸಬೇಕು. ನಿನ್ನೆಗಿಂತ ಇಂದು ಸ್ವಲ್ಪ ಹೆಚ್ಚು ತಿಳಿದುಕೊಂಡಿದ್ದೇವೆಯೇ? ನಿನ್ನೆಗಿಂತ ಇಂದು ಸ್ವಲ್ಪ ಹೆಚ್ಚು ತಾಳ್ಮೆ ಬಂದಿದೆಯೇ? ನಿನ್ನೆ ಮಾಡಲಾಗದ ಒಂದು ಕೆಲಸವನ್ನು ಇಂದು ಮಾಡಿದ್ದೇವೆಯೇ? ಹಾಗಿದ್ದರೆ ನಾವು ಮುಂದೆ ಸಾಗುತ್ತಿದ್ದೇವೆ. ಮೊದಲು ಇದ್ದದ್ದಕ್ಕಿಂತ ಉತ್ತಮ ಸ್ಥಿತಿಯಲ್ಲಿದ್ದೇವಾ ಎಂಬ ಪ್ರಶ್ನೆಗೆ ಮನಸ್ಸಿನಲ್ಲಿ “ಹೌದು” ಎಂಬ ಉತ್ತರ ಬಂದರೆ, ಅದೇ ನಮ್ಮ ಗಳಿಕೆ. ಇನ್ಯಾರೊಂದಿಗೋ ಹೋಲಿಸಿಕೊಂಡು ನಮ್ಮ ನೆಮ್ಮದಿಯನ್ನು ಕಳೆದುಕೊಳ್ಳುವುದರಲ್ಲಿ ಅರ್ಥವಿಲ್ಲ.
ಸೋಲಿನ ವಿಷಯವೂ ಇದೇ. ನಿನ್ನೆ ಯಾವುದೋ ಕೆಲಸದಲ್ಲಿ ಸೋತಿದ್ದರೆ, ಇಂದು ಮತ್ತೆ ಪ್ರಯತ್ನಿಸಬೇಕು. “ನನಗೆ ಆಗುವುದಿಲ್ಲ” ಎಂದು ಅಲ್ಲಿಯೇ ನಿಲ್ಲಬಾರದು. ಏನು ತಪ್ಪಾಯಿತು ಎಂದು ನೋಡಬೇಕು. ಬೇಕಾದರೆ ಕಾರ್ಯಶೈಲಿಯನ್ನು ಬದಲಿಸಬೇಕು. ಇನ್ನಷ್ಟು ಕಲಿಯಬೇಕು. ಮತ್ತೆ ಪ್ರಯತ್ನಿಸಬೇಕು. ಸೋಲು ಬಂದರೆ ದಾರಿ ಮುಗಿದಿದೆ ಎಂದಲ್ಲ. ಅದು ನಮ್ಮಲ್ಲಿ ಏನು ಬದಲಾವಣೆ ಬೇಕು ಎನ್ನುವುದನ್ನು ತೋರಿಸುತ್ತದೆ. ನಿನ್ನೆ ಸೋತಿದ್ದೇವೆ ಎನ್ನುವುದಕ್ಕಿಂತ, ಇಂದು ಮತ್ತೆ ಎದ್ದು ನಿಂತಿದ್ದೇವೆ ಎನ್ನುವುದು ಮುಖ್ಯ.
ಹಾಗಾಗಿ “ಇಂದು ನಿನ್ನೆಗಿಂತ ಸ್ವಲ್ಪ ಚೆನ್ನಾಗಿರಬೇಕು” ಎನ್ನುವುದು ನಮ್ಮ ಬದುಕಿನ ಒಂದು ಸಣ್ಣ ನಿಯಮವಾಗಬಹುದು. ನಿನ್ನೆಗಿಂತ ಇಂದು ಒಂದು ತಪ್ಪು ಕಡಿಮೆ ಮಾಡಬೇಕು. ಒಂದು ಒಳ್ಳೆಯ ಅಭ್ಯಾಸ ಬೆಳೆಸಬೇಕು. ಒಂದು ಕೆಲಸವನ್ನು ಸಮಯಕ್ಕೆ ಸರಿಯಾಗಿ ಮಾಡಬೇಕು. ಒಂದು ಸಂಬಂಧವನ್ನು ಚೆನ್ನಾಗಿ ನೋಡಿಕೊಳ್ಳಬೇಕು. ನಮ್ಮಿಂದ ತಪ್ಪಾದರೆ ಅದನ್ನು ಒಪ್ಪಿಕೊಳ್ಳಬೇಕು. ಯಾರಿಗಾದರೂ ನೋವು ಕೊಟ್ಟಿದ್ದರೆ ಕ್ಷಮೆ ಕೇಳಬೇಕು. ಇವೆಲ್ಲವೂ ನಿನ್ನೆಗಿಂತ ಇಂದಿನ ನಮ್ಮನ್ನು ಉತ್ತಮವಾಗಿಸುತ್ತವೆ.
ಜೀವನದಲ್ಲಿ ಪ್ರತಿದಿನವೂ ಹಬ್ಬದ ದಿನವಾಗಿರುವುದಿಲ್ಲ. ಕೆಲವು ದಿನಗಳು ತುಂಬಾ ಚೆನ್ನಾಗಿರುತ್ತವೆ. ಕೆಲವು ದಿನಗಳು ಕಷ್ಟ ಕೊಡುತ್ತವೆ. ಕೆಲವೊಮ್ಮೆ ಕಣ್ಣೀರು ಬರುತ್ತದೆ. ಕೆಲವೊಮ್ಮೆ ನಮ್ಮ ಸಹನೆಯನ್ನೇ ಪರೀಕ್ಷಿಸುವ ಪರಿಸ್ಥಿತಿ ಎದುರಾಗುತ್ತದೆ. ಆದರೆ ಯಾವ ದಿನವೂ ಶಾಶ್ವತವಲ್ಲ. ಕಷ್ಟದ ದಿನವೂ ಕಳೆದುಹೋಗುತ್ತದೆ. ಅದಕ್ಕಾಗಿಯೇ ನಿನ್ನೆ ಎಷ್ಟು ಕಷ್ಟವಾಗಿತ್ತು ಎಂದು ಯೋಚಿಸುವುದಕ್ಕಿಂತ, ಆ ಕಷ್ಟದಿಂದ ಇಂದು ಏನು ಕಲಿಯಬೇಕು ಎಂದು ಯೋಚಿಸುವುದು ಮುಖ್ಯ.
ನಿನ್ನೆ ಮುಗಿದಿದೆ. ನಾಳೆ ಇನ್ನೂ ಬಂದಿಲ್ಲ. ನಮ್ಮ ಕೈಯಲ್ಲಿರುವುದು ಇಂದು. ಹಾಗಾಗಿ ನಿನ್ನೆಯ ತಪ್ಪನ್ನು ಇಂದಿನ ಶಿಕ್ಷೆಯನ್ನಾಗಿ ಮಾಡಿಕೊಳ್ಳಬೇಡಿ. ನಿನ್ನೆಯ ಸೋಲನ್ನು ಇಂದಿನ ಭಯವನ್ನಾಗಿ ಮಾಡಿಕೊಳ್ಳಬೇಡಿ. ನಿನ್ನೆಯ ನೋವನ್ನು ಇಂದಿನ ಬದುಕಿನ ಮೇಲೂ ಹೊತ್ತುಕೊಂಡು ಹೋಗಬೇಡಿ. ನಿನ್ನೆ ನಮಗೆ ಏನು ಕಲಿಸಿತು ಎನ್ನುವುದನ್ನು ಮಾತ್ರ ತೆಗೆದುಕೊಂಡು ಮುಂದೆ ನಡೆಯಬೇಕು.
ನಿನ್ನೆ ಹೇಗಿತ್ತು ಎನ್ನುವುದು ಈಗ ನಮ್ಮ ಕೈಯಲ್ಲಿಲ್ಲ. ಆದರೆ ಇಂದು ಹೇಗಿರಬೇಕು ಎನ್ನುವುದರಲ್ಲಿ ನಮ್ಮ ಪಾತ್ರವಿದೆ. ನಿನ್ನೆಗಿಂತ ಇಂದು ನಾವು ಒಂದು ಹೆಜ್ಜೆ ಮುಂದೆ ಬಂದಿದ್ದರೆ, ಅದೇ ಗೆಲುವು. ಎಲ್ಲರಿಗಿಂತ ಮುಂದೆ ಹೋಗಬೇಕೆಂದಿಲ್ಲ. ನಿನ್ನೆಯ ನಮ್ಮನ್ನೇ ಮೀರಿದರೆ ಸಾಕು.
ಹಾಗಾಗಿ ಇಂದು ನಿನ್ನೆಗಿಂತ ಸ್ವಲ್ಪ ಚೆನ್ನಾಗಿರಲಿ. ಇಂದಿಗಿಂತ ನಾಳೆ ಇನ್ನೂ ಚೆನ್ನಾಗಿರಲಿ. ದೊಡ್ಡ ಬದಲಾವಣೆ ಒಂದೇ ದಿನದಲ್ಲಿ ಆಗಬೇಕಿಲ್ಲ. ಪ್ರತಿದಿನವೂ ಒಂದು ಸಣ್ಣ ಹೆಜ್ಜೆ ಮುಂದೆ ಇಡೋಣ. ಏಕೆಂದರೆ ಆ ಸಣ್ಣ ಹೆಜ್ಜೆಗಳೇ ಮುಂದೆ ನಮ್ಮ ಬದುಕಿನ ದೊಡ್ಡ ಬದಲಾವಣೆಯಾಗುತ್ತವೆ.
