ಕಾರವಾರ: ಉತ್ತರ ಕನ್ನಡ ಜಿಲ್ಲೆ 2026ರ ಎಸ್ಎಸ್ಎಲ್ಸಿ ಪರೀಕ್ಷೆಯಲ್ಲಿ ಗಮನಾರ್ಹ ಸಾಧನೆ ಮಾಡಿದ್ದು, 98.09 ಶೇಕಡಾ ಫಲಿತಾಂಶದೊಂದಿಗೆ ರಾಜ್ಯದಲ್ಲಿ ಮೂರನೇ ಸ್ಥಾನವನ್ನು ಪಡೆದುಕೊಂಡಿದೆ. ಜಿಲ್ಲೆಯ ಒಟ್ಟು 199 ಪ್ರೌಢಶಾಲೆಗಳ ಪೈಕಿ 134 ಶಾಲೆಗಳು ಶೇ.100 ಫಲಿತಾಂಶ ದಾಖಲಿಸಿರುವುದು ವಿಶೇಷವಾಗಿದ್ದು, ಇದರಲ್ಲಿ 47 ಸರ್ಕಾರಿ, 39 ಅನುದಾನಿತ ಹಾಗೂ 48 ಅನುದಾನರಹಿತ ಶಾಲೆಗಳು ಸೇರಿವೆ.
ರಾಜ್ಯ ಮಟ್ಟದಲ್ಲಿಯೂ ಜಿಲ್ಲೆ ತನ್ನ ಪ್ರತಿಭೆಯನ್ನು ಮೆರೆದಿದ್ದು, 25 ವಿದ್ಯಾರ್ಥಿಗಳು ರಾಜ್ಯದ 2ರಿಂದ 10ನೇ ರ್ಯಾಂಕ್ಗಳಲ್ಲಿ ಸ್ಥಾನ ಪಡೆದರೆ, ಜಿಲ್ಲೆಯ ಮಟ್ಟದಲ್ಲಿ ಟಾಪ್ 10ರಲ್ಲಿ 49 ವಿದ್ಯಾರ್ಥಿಗಳು ಸ್ಥಾನ ಗಳಿಸಿದ್ದಾರೆ.
ತಾಲೂಕು ಮಟ್ಟದಲ್ಲಿ ಹೊನ್ನಾವರ 99.08 ಶೇಕಡಾ ಫಲಿತಾಂಶದೊಂದಿಗೆ ಪ್ರಥಮ ಸ್ಥಾನದಲ್ಲಿದ್ದರೆ, ಭಟ್ಕಳ ಶೇ. 98.63-ದ್ವಿತೀಯ, ಅಂಕೋಲಾ ಶೇ. 97.78-ತೃತೀಯ, ಕುಮಟಾ ಶೇ. 97.65-ನಾಲ್ಕನೇ ಹಾಗೂ ಕಾರವಾರ ಶೇ. 97.25 ಸಾಧನೆಯೊಂದಿಗೆ ಐದನೇ ಸ್ಥಾನದಲ್ಲಿವೆ.
ಒಟ್ಟಾರೆ 9545 ವಿದ್ಯಾರ್ಥಿಗಳು ಪರೀಕ್ಷೆಗೆ ಹಾಜರಾಗಿದ್ದು, 8802 ಮಂದಿ ಉತ್ತೀರ್ಣರಾಗಿದ್ದಾರೆ. ಇದರ ಫಲವಾಗಿ ಒಟ್ಟು ಪಾಸ್ ಪ್ರಮಾಣ 92.22 ಶೇಕಡಾ ಆಗಿದೆ. ವಿಶೇಷವಾಗಿ ಹೊಸ ವಿದ್ಯಾರ್ಥಿಗಳಲ್ಲಿ 8809ರಲ್ಲಿ 8641 ಮಂದಿ ಉತ್ತೀರ್ಣರಾಗಿದ್ದು, 98.09 ಶೇಕಡಾ ಫಲಿತಾಂಶ ದಾಖಲಾಗಿದೆ.
ಶಾಲಾವಾರು ವಿಶ್ಲೇಷಣೆಯಲ್ಲಿ ಸರ್ಕಾರಿ ಶಾಲೆಗಳು 98.61 ಶೇಕಡಾ, ಅನುದಾನಿತ ಶಾಲೆಗಳು 96.69 ಶೇಕಡಾ ಹಾಗೂ ಅನುದಾನರಹಿತ ಶಾಲೆಗಳು 99.47 ಶೇಕಡಾ ಫಲಿತಾಂಶದೊಂದಿಗೆ ಅತ್ಯುತ್ತಮ ಸಾಧನೆ ಮಾಡಿವೆ. ಲಿಂಗವಾರು ಫಲಿತಾಂಶದಲ್ಲಿ ವಿದ್ಯಾರ್ಥಿನಿಯರು 98.99 ಶೇಕಡಾ ಫಲಿತಾಂಶದೊಂದಿಗೆ ವಿದ್ಯಾರ್ಥಿಗಳಿಗಿಂತ (97.08%) ಮುನ್ನಡೆಯನ್ನು ಸಾಧಿಸಿದ್ದಾರೆ.
ಗ್ರಾಮೀಣ ಪ್ರದೇಶದ ವಿದ್ಯಾರ್ಥಿಗಳು 98.50 ಶೇಕಡಾ ಫಲಿತಾಂಶದೊಂದಿಗೆ ನಗರ ಪ್ರದೇಶದ 97.40 ಶೇಕಡಾ ಫಲಿತಾಂಶಕ್ಕಿಂತ ಮೇಲುಗೈ ಸಾಧಿಸಿರುವುದು ಗಮನಾರ್ಹವಾಗಿದೆ.
ಗ್ರೇಡ್ವಾರು ಫಲಿತಾಂಶದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು A+ ಮತ್ತು A ಗ್ರೇಡ್ಗಳನ್ನು ಗಳಿಸಿರುವುದು ಜಿಲ್ಲೆಯ ಶೈಕ್ಷಣಿಕ ಮಟ್ಟವನ್ನು ತೋರಿಸುತ್ತದೆ. ಕನ್ನಡ, ಉರ್ದು ಹಾಗೂ ಇಂಗ್ಲೀಷ್ ಮಾಧ್ಯಮಗಳಲ್ಲಿ ವಿದ್ಯಾರ್ಥಿಗಳು ಅತ್ಯುತ್ತಮ ಅಂಕಗಳನ್ನು ಪಡೆದುಕೊಂಡಿದ್ದು, ವಿಶೇಷವಾಗಿ ಇಂಗ್ಲೀಷ್ ಮಾಧ್ಯಮದಲ್ಲಿ 625ರಲ್ಲಿ 624 ಅಂಕಗಳನ್ನು ಪಡೆದು 99.84 ಶೇಕಡಾ ಸಾಧನೆಯೊಂದಿಗೆ ಗರಿಷ್ಠ ಸಾಧನೆ ದಾಖಲಿಸಲಾಗಿದೆ.
ಒಟ್ಟಾರೆ ಎಲ್ಲಾ ಮಾನದಂಡಗಳಲ್ಲಿಯೂ ಉತ್ತರ ಕನ್ನಡ ಜಿಲ್ಲೆ ಉತ್ತಮ ಫಲಿತಾಂಶದ ಮೂಲಕ ರಾಜ್ಯದಲ್ಲಿ ತನ್ನ ಶೈಕ್ಷಣಿಕ ಮೇಲುಗೈಯನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.
