ಇಂದಿನ ಡಿಜಿಟಲ್ ಯುಗದಲ್ಲಿ ಮೊಬೈಲ್ ಬ್ಯಾಂಕಿಂಗ್, ಯುಪಿಐ, ಗೂಗಲ್ ಪೇ, ಫೋನ್ಪೇ ಮುಂತಾದ ಸೇವೆಗಳ ಮೂಲಕ ಹಣ ವರ್ಗಾವಣೆ ಕ್ಷಣಾರ್ಧದಲ್ಲಿ ಸಾಧ್ಯವಾಗಿದೆ. ಆದರೆ ವೇಗ ಮತ್ತು ಅನುಕೂಲತೆಯ ಜೊತೆಗೆ ಸಣ್ಣ ಅಜಾಗರೂಕತೆಯೂ ಕೆಲವೊಮ್ಮೆ ಸಂಕಷ್ಟಕ್ಕೆ ಕಾರಣವಾಗಬಹುದು.
ಖಾತೆ ಸಂಖ್ಯೆ ಅಥವಾ ಮೊಬೈಲ್ ಸಂಖ್ಯೆ ನಮೂದಿಸುವಾಗ ಒಂದು ಅಂಕೆ ತಪ್ಪಿದರೂ ಹಣ ಬೇರೆಯವರ ಖಾತೆಗೆ ಜಮೆಯಾಗುವ ಸಾಧ್ಯತೆ ಇದೆ. ಇಂತಹ ಸಂದರ್ಭದಲ್ಲಿ ಆತಂಕಪಡುವ ಬದಲು ಕೆಲವು ಕ್ರಮಗಳನ್ನು ತಕ್ಷಣ ಕೈಗೊಂಡರೆ ಹಣವನ್ನು ಮರಳಿ ಪಡೆಯುವ ಅವಕಾಶವಿದೆ.
ರತ್ನಮ್ಮ ಎಂಬ ಮಹಿಳೆಯ ಅನುಭವವೂ ಇದೇ ಸಂಗತಿಯನ್ನು ನೆನಪಿಸುತ್ತದೆ. ಮೊಬೈಲ್ ಬ್ಯಾಂಕಿಂಗ್ ಮೂಲಕ ಮಗಳಿಗೆ ಹಣ ಕಳುಹಿಸುವ ವೇಳೆ ಖಾತೆ ಸಂಖ್ಯೆಯಲ್ಲಿ ಒಂದು ಅಂಕೆ ತಪ್ಪಾಗಿ ನಮೂದಿಸಿದ್ದರಿಂದ ಹಣ ಬೇರೆ ವ್ಯಕ್ತಿಯ ಖಾತೆಗೆ ಜಮೆಯಾಯಿತು. ಇಂತಹ ತಪ್ಪುಗಳು ಯಾರಿಂದಲೂ ಸಂಭವಿಸಬಹುದು. ಆದರೆ ಹಣ ಕಳೆದುಹೋಯಿತು ಎಂದು ಕೈಚೆಲ್ಲುವ ಅಗತ್ಯವಿಲ್ಲ.
ಮೊದಲನೆಯದಾಗಿ, ಹಣ ತಪ್ಪಾಗಿ ವರ್ಗಾವಣೆಯಾಗಿದೆ ಎಂಬುದು ತಿಳಿದ ತಕ್ಷಣವೇ ಸಂಬಂಧಿಸಿದ ಬ್ಯಾಂಕ್ನ ಗ್ರಾಹಕ ಸೇವಾ ಕೇಂದ್ರವನ್ನು ಸಂಪರ್ಕಿಸಬೇಕು. ವಹಿವಾಟಿನ ವಿವರ, ದಿನಾಂಕ, ಮೊತ್ತ, ಯುಪಿಐ ಐಡಿ ಅಥವಾ ಟ್ರಾನ್ಸಾಕ್ಷನ್ ಸಂಖ್ಯೆಯನ್ನು ನೀಡಿ ದೂರು ದಾಖಲಿಸಬೇಕು. ಸಾಧ್ಯವಾದರೆ ವಹಿವಾಟನ್ನು ತಾತ್ಕಾಲಿಕವಾಗಿ ತಡೆಹಿಡಿಯುವಂತೆ ಮನವಿ ಮಾಡಬಹುದು.
ನಂತರ ಬ್ಯಾಂಕ್ ಶಾಖೆಗೆ ಭೇಟಿ ನೀಡಿ ಲಿಖಿತ ಅರ್ಜಿ ಸಲ್ಲಿಸುವುದು ಸೂಕ್ತ. ಅರ್ಜಿಯೊಂದಿಗೆ ವಹಿವಾಟಿನ ರಸೀದಿ ಅಥವಾ ಸ್ಕ್ರೀನ್ಶಾಟ್ ಲಗತ್ತಿಸಿದರೆ ಪ್ರಕ್ರಿಯೆ ಸುಲಭವಾಗುತ್ತದೆ. ಬ್ಯಾಂಕ್ ಅಧಿಕಾರಿಗಳು ಹಣ ಜಮೆಯಾದ ಖಾತೆಯ ವಿವರಗಳನ್ನು ಪರಿಶೀಲಿಸಿ, ಸಂಬಂಧಪಟ್ಟ ಬ್ಯಾಂಕ್ ಅಥವಾ ಖಾತೆದಾರರನ್ನು ಸಂಪರ್ಕಿಸಲು ಕ್ರಮ ಕೈಗೊಳ್ಳುತ್ತಾರೆ.
ಒಂದೇ ಬ್ಯಾಂಕ್ನ ಎರಡು ಖಾತೆಗಳ ನಡುವೆ ಹಣ ವರ್ಗಾವಣೆಯಾಗಿದ್ದರೆ ಸಮಸ್ಯೆ ತುಸು ಬೇಗ ಪರಿಹಾರವಾಗುವ ಸಾಧ್ಯತೆ ಇರುತ್ತದೆ. ಬೇರೆ ಬ್ಯಾಂಕ್ಗೆ ಹಣ ಜಮೆಯಾಗಿದ್ದರೆ ಎರಡೂ ಬ್ಯಾಂಕ್ಗಳ ನಡುವೆ ಸಮನ್ವಯದ ಮೂಲಕ ಹಣ ಹಿಂದಿರುಗಿಸುವ ಪ್ರಕ್ರಿಯೆ ನಡೆಯುತ್ತದೆ. ಹಣ ಸ್ವೀಕರಿಸಿದ ವ್ಯಕ್ತಿ ಸಹಕರಿಸಿದರೆ ಹಣ ಮರಳಿ ಬರುವುದು ಸುಲಭ. ಕೆಲವೊಮ್ಮೆ ಪ್ರಕ್ರಿಯೆಗೆ ಕೆಲವು ದಿನಗಳ ಕಾಲಾವಕಾಶ ಬೇಕಾಗಬಹುದು.
ಭಾರತೀಯ ರಿಸರ್ವ್ ಬ್ಯಾಂಕ್ನ ಮಾರ್ಗಸೂಚಿಗಳ ಪ್ರಕಾರ, ಹಣ ವರ್ಗಾವಣೆ ಮಾಡುವ ಮೊದಲು ಖಾತೆ ಸಂಖ್ಯೆ, ಐಎಫ್ಎಸ್ಸಿ ಕೋಡ್, ಮೊಬೈಲ್ ಸಂಖ್ಯೆ ಅಥವಾ ಯುಪಿಐ ಐಡಿಯನ್ನು ಗ್ರಾಹಕರು ಸರಿಯಾಗಿ ಪರಿಶೀಲಿಸುವ ಜವಾಬ್ದಾರಿ ಹೊಂದಿರುತ್ತಾರೆ. ಆದ್ದರಿಂದ ಯಾವುದೇ ವಹಿವಾಟು ಪೂರ್ಣಗೊಳಿಸುವ ಮುನ್ನ ವಿವರಗಳನ್ನು ಕನಿಷ್ಠ ಎರಡು ಬಾರಿ ಪರಿಶೀಲಿಸುವುದು ಅತ್ಯಂತ ಮುಖ್ಯ.
ಡಿಜಿಟಲ್ ಬ್ಯಾಂಕಿಂಗ್ ಜೀವನವನ್ನು ಸುಲಭಗೊಳಿಸಿದರೂ, ಎಚ್ಚರಿಕೆಯಿಂದ ಬಳಸಿದಾಗ ಮಾತ್ರ ಅದರ ಪ್ರಯೋಜನ ಸಂಪೂರ್ಣವಾಗಿ ಸಿಗುತ್ತದೆ. ತಪ್ಪು ಸಂಭವಿಸಿದರೆ ತಕ್ಷಣ ಬ್ಯಾಂಕ್ಗೆ ಮಾಹಿತಿ ನೀಡಿ ಅಗತ್ಯ ದಾಖಲೆಗಳೊಂದಿಗೆ ದೂರು ಸಲ್ಲಿಸುವುದು ಹಣವನ್ನು ಮರಳಿ ಪಡೆಯುವ ಮೊದಲ ಹೆಜ್ಜೆ. ಆದ್ದರಿಂದ, ಇಂತಹ ಸಂದರ್ಭ ನಿಮಗೂ ಎದುರಾದರೆ ಚಿಂತೆ ಬಿಡಿ, ಕೂಡಲೇ ನಿಮ್ಮ ಖಾತೆಯಿರುವ ಬ್ಯಾಂಕ್ ಶಾಖೆಗೆ ಓಡಿ!
