ಯಲ್ಲಾಪುರದಿಂದ ಕಣಕ್ಕಿಳಿಯುತ್ತಾರಾ ಮಾಜಿ ಸಂಸದ ಅನಂತಕುಮಾರ್ ಹೆಗಡೆ?
ಒಂದು ಕಾಲದಲ್ಲಿ ಉತ್ತರ ಕನ್ನಡ ಬಿಜೆಪಿಯ ರಾಜಕೀಯ ಎಂದರೆ ಅನಂತಕುಮಾರ್ ಹೆಗಡೆ ಎಂಬ ಹೆಸರೇ ಮೊದಲು ಕೇಳಿಬರುತ್ತಿತ್ತು. ಲೋಕಸಭೆ ಚುನಾವಣೆ ಇರಲಿ, ಹಿಂದುತ್ವದ ವಿಚಾರ ಇರಲಿ, ಸಂಘಟನೆಯ ಒಳಜಗಳ ಇರಲಿ, ದೆಹಲಿಯ ರಾಜಕೀಯ ಬೆಳವಣಿಗೆ ಇರಲಿ ಅವರ ನಿಲುವು ಸುದ್ದಿಯಾಗುತ್ತಿತ್ತು.
ಆದರೆ ಕಳೆದ ಕೆಲವು ವರ್ಷಗಳಿಂದ ಅವರು ಸಕ್ರಿಯ ರಾಜಕೀಯದಿಂದ ಬಹುತೇಕ ದೂರ ಉಳಿದಿದ್ದಾರೆ. ಆದರೂ ಅವರ ಹೆಸರು ಮಾತ್ರ ಉತ್ತರ ಕನ್ನಡ ರಾಜಕೀಯದಲ್ಲಿ ಕೇಳಿಬರುತ್ತಲೇ ಇದೆ.
ಈಗ ಹೊಸದೊಂದು ರಾಜಕೀಯ ಚರ್ಚೆ ಜಿಲ್ಲೆಯ ರಾಜಕೀಯ ವಲಯದಲ್ಲಿ ನಿಧಾನವಾಗಿ ತಲೆಎತ್ತುತ್ತಿದೆ. ಮುಂದಿನ ವಿಧಾನಸಭೆ ಚುನಾವಣೆಯಲ್ಲಿ ಅನಂತಕುಮಾರ್ ಹೆಗಡೆ ಯಲ್ಲಾಪುರ ಕ್ಷೇತ್ರದಿಂದ ಬಿಜೆಪಿ ಅಭ್ಯರ್ಥಿಯಾಗಿ ಕಣಕ್ಕಿಳಿಯುತ್ತಾರಾ?
ಸದ್ಯಕ್ಕೆ ಇದಕ್ಕೆ ಯಾರ ಬಳಿಯೂ ಅಧಿಕೃತ ಉತ್ತರ ಇಲ್ಲ. ಆದರೆ ಪ್ರಶ್ನೆ ಮಾತ್ರ ದಿನದಿಂದ ದಿನಕ್ಕೆ ದೊಡ್ಡದಾಗುತ್ತಿದೆ.
ಕಾರಣಗಳೂ ಇಲ್ಲದಿಲ್ಲ. ಉತ್ತರ ಕನ್ನಡದಲ್ಲಿ ಬಿಜೆಪಿಯ ಸಾಂಪ್ರದಾಯಿಕ ಪ್ರಾಬಲ್ಯ ಹಿಂದಿನಷ್ಟಿಲ್ಲ ಎಂಬ ಮಾತು ಪಕ್ಷದ ಒಳಗಡೆಯೇ ಕೇಳಿಬರುತ್ತಿದೆ. ಕೆಲವು ಚುನಾವಣಾ ಫಲಿತಾಂಶಗಳು, ಸ್ಥಳೀಯ ಮಟ್ಟದ ಅಸಮಾಧಾನಗಳು ಹಾಗೂ ಸಂಘಟನೆಯ ಚಟುವಟಿಕೆಗಳ ಬಗ್ಗೆ ಕಾರ್ಯಕರ್ತರಲ್ಲಿರುವ ಚರ್ಚೆಗಳು ಈ ಅಭಿಪ್ರಾಯಕ್ಕೆ ಬಲ ನೀಡಿವೆ.
ಇತ್ತೀಚಿನ ಕೆಲವು ಚುನಾವಣೆಗಳಲ್ಲೂ ಬಿಜೆಪಿ ನಿರೀಕ್ಷಿಸಿದ್ದಷ್ಟು ಸುಲಭ ಗೆಲುವು ಸಾಧಿಸಲು ಸಾಧ್ಯವಾಗಿಲ್ಲ ಎಂಬ ವಿಶ್ಲೇಷಣೆ ರಾಜಕೀಯ ವಲಯದಲ್ಲಿ ಕೇಳಿಬಂದಿದೆ. ಇದರ ನಡುವೆ, ಯಲ್ಲಾಪುರ ವಿಧಾನಸಭಾ ಕ್ಷೇತ್ರದಲ್ಲಿ ಬಿಜೆಪಿಗೆ ಭವಿಷ್ಯದ ಮುಖ ಯಾರು ಎಂಬ ಚರ್ಚೆಯೂ ಈಗಲೇ ಆರಂಭವಾಗಿದೆ.
ಕ್ಷೇತ್ರಕ್ಕೆ ಬಲಿಷ್ಠ, ರಾಜ್ಯಮಟ್ಟದ ಪ್ರಭಾವ ಹೊಂದಿರುವ ನಾಯಕನ ಅಗತ್ಯವಿದೆ ಎಂದು ಪಕ್ಷದ ಒಂದು ವಲಯ ಅಭಿಪ್ರಾಯಪಡುತ್ತಿದೆ. ಆ ಸಂದರ್ಭದಲ್ಲಿ ಮತ್ತೆ ಕೇಳಿಬರುವ ಹೆಸರು ಅನಂತಕುಮಾರ್ ಹೆಗಡೆ!
ಅವರ ರಾಜಕೀಯ ಶೈಲಿ ಇತರ ನಾಯಕರಿಗಿಂತ ವಿಭಿನ್ನ. ಹಿಂದುತ್ವದ ಖಡಕ್ ಪ್ರತಿಪಾದನೆ, ನೇರ ಮಾತು, ಯಾವುದೇ ವಿಷಯದಲ್ಲಿ ರಾಜಿ ಮಾಡಿಕೊಳ್ಳದ ಧೋರಣೆ ಹಾಗೂ ತಮ್ಮದೇ ಆದ ಬೆಂಬಲಿಗರ ವಲಯ ಇವೆಲ್ಲವೂ ಅವರನ್ನು ಇಂದಿಗೂ ವಿಭಿನ್ನ ನಾಯಕರಾಗಿ ಗುರುತಿಸುವ ಅಂಶಗಳು. ಸಕ್ರಿಯ ರಾಜಕೀಯದಿಂದ ದೂರವಿದ್ದರೂ, ಸಾಮಾಜಿಕ ಮಾಧ್ಯಮಗಳಲ್ಲಿ ಅವರ ಭಾಷಣಗಳ ತುಣುಕುಗಳು, ಹಳೆಯ ರಾಜಕೀಯ ನಿರ್ಧಾರಗಳು ಮತ್ತು ಅವರ ಪರ-ವಿರೋಧದ ಚರ್ಚೆಗಳು ಇನ್ನೂ ಜೀವಂತವಾಗಿವೆ.
ಆದರೆ ಇನ್ನೊಂದು ಪ್ರಶ್ನೆಯೂ ಇದೆ. ಅವರು ಸ್ಪರ್ಧಿಸಲು ಆಸಕ್ತಿ ತೋರಿಸುತ್ತಾರೆಯೇ? ಕಳೆದ ಕೆಲ ವರ್ಷಗಳಿಂದ ಅವರು ಚುನಾವಣಾ ರಾಜಕೀಯದ ಬಗ್ಗೆ ಸಾರ್ವಜನಿಕವಾಗಿ ಹೆಚ್ಚಿನ ಚಟುವಟಿಕೆ ತೋರಿಸಿಲ್ಲ. ಪಕ್ಷದ ರಾಜ್ಯ ಅಥವಾ ಕೇಂದ್ರ ನಾಯಕತ್ವವೂ ಈ ಬಗ್ಗೆ ಯಾವುದೇ ಸೂಚನೆ ನೀಡಿಲ್ಲ. ಹೀಗಾಗಿ ಅವರ ಸ್ಪರ್ಧೆಯ ಬಗ್ಗೆ ಸದ್ಯಕ್ಕೆ ಯಾವುದೇ ಅಧಿಕೃತ ಮಾಹಿತಿ ಅಥವಾ ದೃಢೀಕರಣ ಇಲ್ಲ.
ಆದರೂ ರಾಜಕೀಯದಲ್ಲಿ ಚರ್ಚೆಗಳೇ ಅನೇಕ ಬಾರಿ ಭವಿಷ್ಯದ ಬೆಳವಣಿಗೆಗಳಿಗೆ ಮುನ್ನುಡಿಯಾಗಿಬಿಡುತ್ತವೆ! ಯಲ್ಲಾಪುರದಲ್ಲಿ ಅಭ್ಯರ್ಥಿ ಆಯ್ಕೆ ವಿಚಾರ ಅಂತಿಮ ಹಂತಕ್ಕೆ ಬಂದಾಗ ಪಕ್ಷ ಹೊಸ ಮುಖದತ್ತ ಹೋಗುತ್ತದೆಯೇ ಅಥವಾ ಸಂಘಟನೆಯಲ್ಲಿ ದೊಡ್ಡ ಸಂದೇಶ ನೀಡುವ ಉದ್ದೇಶದಿಂದ ಅನುಭವಿಯೊಬ್ಬರನ್ನು ಕಣಕ್ಕಿಳಿಸುತ್ತದೆಯೇ ಎಂಬ ಕುತೂಹಲ ಸಹಜವಾಗಿದೆ.
ಹೀಗಾಗಿ ʻಅನಂತಕುಮಾರ್ ಹೆಗಡೆ ಯಲ್ಲಾಪುರದಿಂದ ಸ್ಪರ್ಧಿಸುತ್ತಾರೆʼ ಎನ್ನುವುದು ಸದ್ಯಕ್ಕೆ ಸುದ್ದಿಯಲ್ಲ. ಆದರೆ ʻಅನಂತಕುಮಾರ್ ಹೆಗಡೆ ಸ್ಪರ್ಧಿಸಬೇಕೆಂಬ ಚರ್ಚೆ ಮತ್ತು ಒತ್ತಾಯ ಬಿಜೆಪಿ ಕಾರ್ಯಕರ್ತರ ಒಂದು ವಲಯದಲ್ಲಿ ಕೇಳಿಬರುತ್ತಿದೆʼ ಎನ್ನುವುದಷ್ಟೇ ರಾಜಕೀಯ ವಲಯದಲ್ಲಿ ಸದ್ಯಕ್ಕೆ ಹರಿದಾಡುತ್ತಿರುವ ಮಾತು.
ಆ ಚರ್ಚೆ ಕೇವಲ ರಾಜಕೀಯ ಗುಸುಗುಸುವಾಗಿಯೇ ಉಳಿಯುತ್ತದೆಯೇ ಅಥವಾ ಮುಂದಿನ ದಿನಗಳಲ್ಲಿ ಯಲ್ಲಾಪುರ ವಿಧಾನಸಭಾ ಚುನಾವಣಾ ಸಮೀಕರಣವನ್ನೇ ಬದಲಾಯಿಸುವ ನಿರ್ಧಾರವಾಗಿ ಹೊರಹೊಮ್ಮುತ್ತದೆಯೇ? ಆ ಉತ್ತರ ಸಿಗಲು ಇನ್ನೂ ಸ್ವಲ್ಪ ಕಾಲ ಕಾಯಲೇಬೇಕು! ನೀವೇನಂತೀರಿ…?!
