ಡ್ರೋನ್ ಸರ್ವೇಗೆ ಚಾಲನೆ, ಹೊಸ ಡಿಪಿಆರ್ಗೆ ಸಿದ್ಧತೆ
ಬೆಂಗಳೂರು: ಮೂರುವರೆ ದಶಕಗಳಿಂದ ಕಡತಗಳ ಪುಟಗಳಲ್ಲಿ ಸಿಲುಕಿಕೊಂಡಿದ್ದ ಬೇಡ್ತಿ–ವರದಾ ನದಿ ಜೋಡಣೆ ಯೋಜನೆ ಮತ್ತೊಮ್ಮೆ ಸುದ್ದಿಯ ಕೇಂದ್ರಬಿಂದುವಾಗಿದೆ.
ಈ ಬಾರಿ ಸರ್ಕಾರದ ನಡೆ ಹಿಂದಿನ ಘೋಷಣೆಗಳಂತಿಲ್ಲ ಎಂಬ ನಿರೀಕ್ಷೆಗೆ ಕಾರಣವೂ ಇದೆ. ಏಕೆಂದರೆ, ಯೋಜನೆಯ ಅನುಷ್ಠಾನಕ್ಕೆ ಅಗತ್ಯವಾದ ಅತ್ಯಂತ ಪ್ರಮುಖ ತಾಂತ್ರಿಕ ಹಂತವಾದ ಟೋಪೋಗ್ರಾಫಿಕಲ್ ಡ್ರೋನ್ ಸರ್ವೇಗೆ ಚಾಲನೆ ನೀಡುವ ಪ್ರಕ್ರಿಯೆ ಆರಂಭವಾಗಿದ್ದು, ಮುಂದಿನ ದಿನಗಳಲ್ಲಿ ಯೋಜನೆ ನಿಜಕ್ಕೂ ಕಾರ್ಯರೂಪಕ್ಕೆ ಬರಬಹುದೇ ಎಂಬ ಪ್ರಶ್ನೆಗೆ ಉತ್ತರ ನೀಡುವ ಮೊದಲ ಹೆಜ್ಜೆಯೂ ಹೌದು.
ಜಲಸಂಪನ್ಮೂಲ ಇಲಾಖೆಯ ಅಧೀನದಲ್ಲಿರುವ ಕರ್ನಾಟಕ ಎಂಜಿನಿಯರಿಂಗ್ ಸಂಶೋಧನಾ ಕೇಂದ್ರ (KERS) ಈ ಸಮೀಕ್ಷೆಯ ಹೊಣೆ ಹೊತ್ತಿದೆ. ಅತ್ಯಾಧುನಿಕ ಡ್ರೋನ್ ತಂತ್ರಜ್ಞಾನದ ಮೂಲಕ ಯೋಜನೆಯ ವ್ಯಾಪ್ತಿಯಲ್ಲಿರುವ ಪ್ರದೇಶಗಳ ಭೂಸ್ವರೂಪವನ್ನು ಅಳೆಯಲಾಗುತ್ತದೆ.
ಎತ್ತರ–ತಗ್ಗು, ಬೆಟ್ಟ–ಕಣಿವೆ, ಅರಣ್ಯ ಪ್ರದೇಶಗಳು, ಜಲಮೂಲಗಳು, ಸುರಂಗ ಮಾರ್ಗಗಳ ಸಾಧ್ಯತೆ, ಪೈಪ್ಲೈನ್ ಅಳವಡಿಕೆಗೆ ಸೂಕ್ತ ಸ್ಥಳಗಳು ಸೇರಿದಂತೆ ಯೋಜನೆಗೆ ಅಗತ್ಯವಾದ ಪ್ರತಿಯೊಂದು ತಾಂತ್ರಿಕ ಮಾಹಿತಿಯನ್ನೂ ಈ ಸಮೀಕ್ಷೆ ದಾಖಲಿಸಲಿದೆ. ಸುರಂಗ ನಿರ್ಮಾಣಕ್ಕೆ ಟನಲ್ ಬೋರಿಂಗ್ ಮಷಿನ್ (TBM) ಬಳಸಬಹುದಾದ ಸ್ಥಳಗಳನ್ನೂ ಇದೇ ವೇಳೆ ಗುರುತಿಸಲಾಗುತ್ತದೆ.
ಈ ಸಮೀಕ್ಷೆ ಏಕೆ ಅಷ್ಟು ಮಹತ್ವದ್ದು ಎನ್ನುವುದಕ್ಕೆ ಉತ್ತರ ಯೋಜನೆಯ ಮುಂದಿನ ಹಂತದಲ್ಲಿದೆ. ಡ್ರೋನ್ ಸರ್ವೇ ಪೂರ್ಣಗೊಂಡ ಬಳಿಕ ಅದರ ವರದಿಯ ಆಧಾರದ ಮೇಲೆ ಹೊಸ ವಿವರ ಯೋಜನಾ ವರದಿ (ಡಿಪಿಆರ್) ಸಿದ್ಧವಾಗಲಿದೆ. ಹಲವು ವರ್ಷಗಳ ಹಿಂದೆ ಸಿದ್ಧಗೊಂಡಿದ್ದ ಡಿಪಿಆರ್ ಈಗಿನ ಪರಿಸ್ಥಿತಿಗೆ ಹೊಂದಿಕೆಯಾಗುವುದಿಲ್ಲ ಎನ್ನುವುದು ಅಧಿಕಾರಿಗಳ ಅಭಿಪ್ರಾಯ.
ಈ ಅವಧಿಯಲ್ಲಿ ಭೌಗೋಳಿಕ ಪರಿಸ್ಥಿತಿಗಳು, ತಾಂತ್ರಿಕ ಸಾಮರ್ಥ್ಯ, ಪರಿಸರ ನಿಯಮಗಳು ಮತ್ತು ಯೋಜನಾ ವೆಚ್ಚಗಳಲ್ಲಿ ಸಾಕಷ್ಟು ಬದಲಾವಣೆಗಳಾಗಿವೆ. ಹೀಗಾಗಿ ಹೊಸ ವಾಸ್ತವಾಂಶಗಳನ್ನು ಆಧರಿಸಿದ ಡಿಪಿಆರ್ ರೂಪಿಸುವುದು ಅನಿವಾರ್ಯವಾಗಿದೆ.
ಈ ವರದಿ ಪೂರ್ಣಗೊಂಡ ನಂತರ ಕೇಂದ್ರ ಸರ್ಕಾರ ಸೇರಿದಂತೆ ವಿವಿಧ ಇಲಾಖೆಗಳ ಅನುಮೋದನೆಗಾಗಿ ಸಲ್ಲಿಸಲಾಗುತ್ತದೆ. ಅನುಮೋದನೆ ದೊರೆತ ಬಳಿಕವೇ ಯೋಜನೆಯ ಅನುಷ್ಠಾನದ ದಿಕ್ಕಿನಲ್ಲಿ ಸರ್ಕಾರ ಮುಂದಿನ ಹೆಜ್ಜೆ ಇಡಲಿದೆ.
ಇದಕ್ಕಾಗಿ ಈಗಾಗಲೇ ಖಾಸಗಿ ಎಂಜಿನಿಯರಿಂಗ್ ಸಂಸ್ಥೆಯನ್ನು ಆಯ್ಕೆ ಮಾಡುವ ಪ್ರಕ್ರಿಯೆ ಆರಂಭವಾಗಿದ್ದು, ಟೋಪೋಗ್ರಾಫಿಕಲ್ ಡ್ರೋನ್ ಸರ್ವೇಗಾಗಿ ಟೆಂಡರ್ ಆಹ್ವಾನಿಸಲಾಗಿದೆ. ಕಾರ್ಯಾದೇಶ ನೀಡಿದ ಮೂರು ತಿಂಗಳೊಳಗೆ ಸಮೀಕ್ಷೆ ಪೂರ್ಣಗೊಳಿಸಿ ವರದಿ ಸಲ್ಲಿಸುವಂತೆ ಷರತ್ತು ವಿಧಿಸಲಾಗಿದೆ. ಅಂದರೆ, ಸರ್ಕಾರ ಈ ಹಂತವನ್ನು ವಿಳಂಬವಿಲ್ಲದೆ ಪೂರ್ಣಗೊಳಿಸುವ ಉದ್ದೇಶದಲ್ಲಿದೆ ಎನ್ನುವುದು ಸ್ಪಷ್ಟವಾಗುತ್ತದೆ.
ಬೇಡ್ತಿ–ವರದಾ ಯೋಜನೆ ಆರಂಭದಿಂದಲೇ ಎರಡು ಭಿನ್ನ ಅಭಿಪ್ರಾಯಗಳ ನಡುವೆ ಸಿಲುಕಿಕೊಂಡಿದೆ. ಉತ್ತರ ಕರ್ನಾಟಕದ ನೀರಿನ ಕೊರತೆಯನ್ನು ನೀಗಿಸಲು ಈ ಯೋಜನೆ ಅತ್ಯಗತ್ಯ ಎಂದು ಒಂದು ವಲಯ ವಾದಿಸಿದರೆ, ಪಶ್ಚಿಮಘಟ್ಟದ ಸೂಕ್ಷ್ಮ ಪರಿಸರ ವ್ಯವಸ್ಥೆಗೆ ಧಕ್ಕೆ ಉಂಟಾಗುವ ಸಾಧ್ಯತೆ ಇದೆ ಎಂದು ಪರಿಸರವಾದಿಗಳು ನಿರಂತರವಾಗಿ ಎಚ್ಚರಿಸುತ್ತಿದ್ದಾರೆ.
ಡ್ರೋನ್ ಹಾರಾಟ ಆರಂಭವಾಗಿರುವುದು ಯೋಜನೆ ಜಾರಿಗೆ ಬಂದಿದೆ ಎನ್ನುವ ಅರ್ಥವಲ್ಲ. ಆದರೆ ಮೂರುವರೆ ದಶಕಗಳಿಂದ ನಿರೀಕ್ಷೆಯಲ್ಲಿದ್ದ ಯೋಜನೆ ಮತ್ತೊಮ್ಮೆ ಆಡಳಿತಾತ್ಮಕವಾಗಿ ಚಲನೆ ಕಂಡಿರುವುದು ಮಾತ್ರ ಸತ್ಯ.
