ಅಸಹಾಯಕನಿಗೆ ಆಸರೆಯಾದ ಯಲ್ಲಾಪುರದ ಯುವ ಹೃದಯಗಳು
ಯಲ್ಲಾಪುರ: ‘ಅನಾಥೋ ದೈವ ರಕ್ಷಕಃ’ ಎನ್ನುವ ಮಾತು, ಅಸಹಾಯಕನಿಗೆ ನೆರವಾಗುವ ವ್ಯಕ್ತಿಯೇ ಆ ಕ್ಷಣದಲ್ಲಿ ದೇವರ ರೂಪದಲ್ಲಿ ಕಾಣಿಸಿಕೊಳ್ಳುತ್ತಾನೆ ಎಂಬ ಅರ್ಥವನ್ನು ಹೊತ್ತಿದೆ. ಸಂಬಂಧಗಳಿಗಿಂತ ಸ್ವಾರ್ಥ ದೊಡ್ಡದಾಗುತ್ತಿರುವ ಈ ಕಾಲದಲ್ಲೂ, ರಸ್ತೆಯ ಬದಿಯಲ್ಲಿ ಅಸಹಾಯಕ ಸ್ಥಿತಿಯಲ್ಲಿ ಬಿದ್ದಿದ್ದ ಅಪರಿಚಿತ ವ್ಯಕ್ತಿಯೊಬ್ಬರ ನೆರವಿಗೆ ಧಾವಿಸಿ, ಆಸ್ಪತ್ರೆಗೆ ದಾಖಲಿಸಿ, ಬಳಿಕ ಆಶ್ರಮದವರೆಗೆ ತಲುಪಿಸಿದ ಕೆಲವರ ಮಾನವೀಯ ನಡೆ ಈ ಮಾತಿಗೆ ಮತ್ತೊಮ್ಮೆ ಅರ್ಥ ನೀಡಿದೆ.
ಯಲ್ಲಾಪುರ ಪಟ್ಟಣದ ದೇವಿ ಮೈದಾನದ ಎದುರು ನಾಗರಕಟ್ಟೆ ಸಮೀಪ ಕಳೆದ ಕೆಲವು ಸಮಯದಿಂದ ಅನಾಮಿಕ ವ್ಯಕ್ತಿಯೊಬ್ಬರು ತೀರಾ ಅಸ್ವಸ್ಥ ಸ್ಥಿತಿಯಲ್ಲಿ ವಾಸಿಸುತ್ತಿರುವುದು ಸ್ಥಳೀಯರ ಗಮನಕ್ಕೆ ಬಂದಿತ್ತು. ಊಟ, ಉಪಚಾರವಿಲ್ಲದೆ ಅನಾರೋಗ್ಯದಿಂದ ಬಳಲುತ್ತಿದ್ದ ಅವರು ರಸ್ತೆಯ ಬದಿಯಲ್ಲೇ ಅಸಹಾಯಕವಾಗಿ ದಿನ ಕಳೆಯುತ್ತಿದ್ದರು.
ಈ ವಿಚಾರವನ್ನು ಗಮನಿಸಿದ ವಿನೋದ ತಳೆಕರ ಅವರು ಪಟ್ಟಣ ಪಂಚಾಯತ್ ಮಾಜಿ ಸದಸ್ಯ ಹಾಗೂ ಬಿಜೆಪಿ ಮುಖಂಡ ಸೋಮೇಶ್ವರ ನಾಯ್ಕ ಅವರ ಗಮನಕ್ಕೆ ತಂದರು. ವಿಷಯ ತಿಳಿದ ಕೂಡಲೇ ಸೋಮೇಶ್ವರ ನಾಯ್ಕ ಅವರು ವಿನೋದ ತಳೆಕರ ಹಾಗೂ ತಮ್ಮ ಸಂಗಡಿಗರೊಂದಿಗೆ ಸ್ಥಳಕ್ಕೆ ತೆರಳಿ, ಅಸ್ವಸ್ಥ ವ್ಯಕ್ತಿಯ ಪರಿಸ್ಥಿತಿಯನ್ನು ವಿಚಾರಿಸಿದರು.
ಆ ವೇಳೆ ಅವರ ಹೆಸರು ಮಹೇಶ ಎಂದು ತಿಳಿದುಬಂದಿದ್ದು, ಅವರು ಹಾವೇರಿ ಜಿಲ್ಲೆಯ ಸವಣೂರ ತಾಲೂಕಿನವರು ಎನ್ನುವ ಮಾಹಿತಿ ತಿಳಿದುಬಂತು. ಆದರೆ, ಅವರ ಕುಟುಂಬದ ಹಿನ್ನೆಲೆ, ಸಂಬಂಧಿಕರು ಅಥವಾ ಪ್ರಸ್ತುತ ಅವರನ್ನು ನೋಡಿಕೊಳ್ಳುವವರು ಯಾರು ಎಂಬುದು ತಕ್ಷಣಕ್ಕೆ ತಿಳಿದುಬಂದಿರಲಿಲ್ಲ. ಅಸ್ವಸ್ಥತೆಯಿಂದ ಬಳಲುತ್ತಿದ್ದ ಅವರನ್ನು ಹಾಗೆಯೇ ಬಿಟ್ಟರೆ ಪರಿಸ್ಥಿತಿ ಮತ್ತಷ್ಟು ಗಂಭೀರವಾಗಬಹುದು ಎಂಬುದನ್ನು ಅರಿತ ಸೋಮೇಶ್ವರ ನಾಯ್ಕ ಹಾಗೂ ಸಂಗಡಿಗರು ತಡಮಾಡದೆ ನೆರವಿಗೆ ಮುಂದಾದರು.
ಅನುಕಂಪ ವ್ಯಕ್ತಪಡಿಸಿ ಮುಂದೆ ಸಾಗುವುದಕ್ಕಿಂತ, ಕೈಹಿಡಿದು ಆಸ್ಪತ್ರೆಗೆ ಕರೆದೊಯ್ಯುವುದೇ ನಿಜವಾದ ಮಾನವೀಯತೆ ಎಂಬಂತೆ ಅವರು ಅಸ್ವಸ್ಥ ಮಹೇಶ ಅವರನ್ನು ಆಟೋ ಮೂಲಕ ಯಲ್ಲಾಪುರ ಸರ್ಕಾರಿ ಆಸ್ಪತ್ರೆಗೆ ಕರೆದೊಯ್ದು ದಾಖಲಿಸಿದರು. ಆಸ್ಪತ್ರೆಯಲ್ಲಿ ಅಗತ್ಯ ಚಿಕಿತ್ಸೆಗೆ ವ್ಯವಸ್ಥೆ ಮಾಡಲಾಯಿತು.
ನಂತರ ಮಹೇಶ ಅವರನ್ನು ಯಲ್ಲಾಪುರದ ನಾಯ್ಕನಕೆರೆ ಸಮೀಪದಲ್ಲಿರುವ ಅನಾಥಾಶ್ರಮಕ್ಕೆ ಕರೆದೊಯ್ದು ಆಶ್ರಯ ಕಲ್ಪಿಸಲಾಗಿದೆ. ಅವರ ಕುಟುಂಬದವರನ್ನು ಪತ್ತೆಹಚ್ಚಿ ಸಂಪರ್ಕಿಸುವ ಪ್ರಯತ್ನ ನಡೆಸಲಾಗುವುದು ಎಂದು ಅವರು ತಿಳಿಸಿದ್ದಾರೆ.
ಈ ಕಾರ್ಯದಲ್ಲಿ ಸೋಮೇಶ್ವರ ನಾಯ್ಕ, ವಿನೋದ ತಳೆಕರ, ಹರೀಶ ಬೋವಿವಡ್ಡರ ಹಾಗೂ ಕುಮಾರ ವಾಲ್ಮೀಕಿ ಅವರು ಭಾಗಿಯಾಗಿದ್ದರು.
ಸಾಮಾನ್ಯವಾಗಿ ಇಂತಹ ಸಂದರ್ಭಗಳಲ್ಲಿ ಅಪರಿಚಿತ ವ್ಯಕ್ತಿಯೊಬ್ಬರು ರಸ್ತೆಯ ಬದಿಯಲ್ಲಿ ಅಸ್ವಸ್ಥರಾಗಿ ಕಂಡರೆ, ಹಲವರು ನೋಡಿ ಸುಮ್ಮನೆ ಮುಂದೆ ಸಾಗುತ್ತಾರೆ. ಆದರೆ ಇಲ್ಲಿ ಕೆಲವರು ಆ ವ್ಯಕ್ತಿಯ ನೋವನ್ನು ತಮ್ಮ ಜವಾಬ್ದಾರಿಯೆಂದು ಭಾವಿಸಿ ನೆರವಿನ ಕೈ ಚಾಚಿದ್ದಾರೆ. ಹೆಸರು, ಪರಿಚಯ, ಸಂಬಂಧ ಯಾವುದೂ ಇಲ್ಲದಿದ್ದರೂ ಒಬ್ಬ ಮನುಷ್ಯನ ಕಷ್ಟಕ್ಕೆ ಮತ್ತೊಬ್ಬ ಮನುಷ್ಯ ಸ್ಪಂದಿಸಿರುವುದು ಈ ಘಟನೆಯ ವಿಶೇಷ.
ಇಂತಹ ಸಣ್ಣಸಣ್ಣ ಮಾನವೀಯ ಕಾರ್ಯಗಳೇ ಸಮಾಜದೊಳಗಿನ ಮಾನವೀಯತೆಯನ್ನು ಜೀವಂತವಾಗಿರಿಸುತ್ತವೆ. ಮಹೇಶ ಅವರಿಗೆ ಚಿಕಿತ್ಸೆ ಹಾಗೂ ಆಶ್ರಯ ದೊರಕುವಂತೆ ಮಾಡಿದ ಈ ಪ್ರಯತ್ನಕ್ಕೆ ಯಲ್ಲಾಪುರ ಪಟ್ಟಣದ ಸಾರ್ವಜನಿಕರಿಂದ ಮೆಚ್ಚುಗೆ ವ್ಯಕ್ತವಾಗಿದೆ.
